رەسەيدەگى جالپىحالىقتىق شەرۋ. 29 اقپان 2020 جىل. ماسكەۋ. فوتو: الەكساندر فەلدمان

رەسەيدەگى نەگىزگى ايماقتاردىڭ ورتالىق قالالارىندا قاستاندىقپەن ولتىرىلگەن ساياساتكەر بوريس نەمتسوۆتى ەسكە الۋ، ونىڭ ءولىمىنىڭ جۇمباعى ءالى اشىلماعانىنا قارسى جالپىحالىقتىق نارازىلىق ءوتىپ جاتىر.

تانىمال رەسەيلىك وپپوزيتسيا ساياساتكەرى، «رەسپۋبليكانسكايا پارتيا روسسي — پارتيا نارودنوي سۆوبودى» (رپر-پارناس) پارتياسىنىڭ توراعالارىنىڭ ءبىرى، ياروسلاۆل وبلىستىق دۋماسىنىڭ دەپۋتاتى بوريس نەمتسوۆتى 2015 جىلدىڭ 27 اقپان كۇنى بەلگىسىز قارۋلى توپ اتىپ كەتكەن بولاتىن.

مىڭداعان ادام قاتىسقان بەيبىت شەرۋدە «پۋتين – ۇرى!»، «ءپۋتينسىز رەسەي»، «ساياسي ولىمگە جول جوق»، «رەسەي ازات بولادى»، «بوريس نەمتسوۆ – رەسەيدىڭ حالىق باتىرى!»، «پۋتين كەتۋى كەرەك!»، «بوستاندىق»، «بوسات» دەپ ۇرانداردى ايتىپ ايقايلادى. ولار بوريس نەمتسوۆتىڭ ولىمىنە تاپسىرىس بەرۋشىلەردى انىقتاپ، جازاعا تارتىلۋىن، كرەمل كومانداسىنىڭ تولىق اۋىسۋىن، ساياسي تۇتقىنداردى دەرەۋ بوساتىلۋىن، ەلدەگى ادام حاقىنىڭ زاڭ جۇزىندە قورعالۋىن تالاپ ەتىپ جاتىر.

«بەلىي سچيوتچيك» مونيتورينگ جۇرگىزۋشى ۇيىمنىڭ ەسەبىنشە، ماسكەۋدە 23 مىڭنان استام، سانكت-پەتەربۋرگتا 3 مىڭداي، كراسنوداردا 2 مىڭعا جۋىق ادام قاتىسىپ جاتىر. ەرەۋىلشىلدەر سانى ساعات سايىن كوبەيۋدە. نارازىلاردىڭ بۇگىنگى شەرۋىنىڭ باستى تاقىرىبى – «كونستيتۋتسيانى ەمەس، بيلىكتى وزگەرتۋ كەرەك!». قۇقىق قورعاۋشىلاردىڭ دەرەگىنشە، بوريس نەمتسوۆتىڭ قازاسىنان كەيىن ساياسي تۇتقىنداردىڭ سانى 20 ەسە وسكەن.

جاپپاي سيپات العان نارازىلىق اۋماعىندا باق وكىلدەرى ەمىن-ەركىن جۇمىس جۇرگىزۋدە. اقپارات دەر كەزىندە تاراپ وتىر. ينتەرنەت بۇعاتتالماعان.


وسىدان بەس جىل بۇرىن ماسكەۋدەگى موسكۆورشى كوپىرىنىڭ بويىندا اق ءتۇستى كولىك مىنگەن قىلمىسكەرلەر التى مارتە وق جاۋدىرىپ، ونىڭ تورتەۋى نەمتسوۆقا تيگەن ەدى. كەيىننەن تەرگەۋ كوميتەتى كاۆكازدىڭ بەس تۇرعىنىن كۇدىكتى دەپ تانىعان. ولار انزور جانە شاديد گۋباشەۆ، زاۋر داداەۆ، حامزات باحاەۆ جانە تەمىرلان ەسكەرحانوۆ.

"The Qazaq Times"