الماتىداعى ادام قۇقىقتارى مەن زاڭدىلىقتى ساقتاۋ جونىندەگى حالىقارالىق بيۋرودا ازاتتىق راديوسى، قازتاگ اگەنتتىگىنىڭ جۋرناليستەرىنە جاسالعان شابۋىل مەن سايتتاردىڭ بۇعاتتالۋىنا بايلانىستى ءباسپاسوز ءماسليحاتى ءوتتى.

جيىنعا قورعاۋشى ايمان وماروۆا، قازاقستانداعى ادام قۇقىقتارى مەن زاڭدىلىقتى ساقتاۋ حالىقارالىق بيۋروسىنىڭ ديرەكتورى ەۆگەني جوۆتيس، ادۆوكات ينارا ماسانوۆا جانە يۋريست گۇلميرا قۋاتبەكوۆا قاتىستى.

2019 جىلدىڭ 22 شىلدەسىندە الماتىداعى قازاقستاندىق ادام قۇقىقتارى مەن زاڭدىلىقتى ساقتاۋ بيۋروسىنداعى ءباسپاسوز جيىنىنا قاتىسۋعا كەلگەن ازاتتىق پەن وزگە دە بىرقاتار باق جۋرناليستەرىنە ءبىر توپ بەلگىسىز ايەل شابۋىل جاساعان. عيمارات دالىزىندە ازاتتىقتىڭ ءتۇسىرىلىم توبىنا بەلگىسىز بەس ايەل تارپا باس سالدى. ولار ازاتتىق وپەراتورى توقمولدا قۇسايىنوۆقا شابۋىلداپ، ونىڭ قولىنداعى ۆيدەوكامەرانى سىندىرىپ، اككۋمۋلياتورىن سۋىرىپ الدى. بولعان وقيعانى سمارتفونعا ءتۇسىرىپ الماق بولعان ءتىلشى نۇرگۇل تاپاەۆاعا قول جۇمسادى.

ءوز مۇددەلەرىن قورعاۋ ءۇشىن «ازاتتىق» راديوسى قورعاۋشى ايمان وماروۆانى، ال اققحب قورعاۋشى ينارا ماسانوۆانى ىسكە تارتتى.

تامىز بەن قىركۇيەكتە شابۋىل جاساعان ادامداردى جۋرناليستەردىڭ زاڭدى كاسىبي قىزمەتىنە كەدەرگى كەلتىرگەنى ءۇشىن جاۋاپقا تارتۋ تۋرالى ءوتىنىش بەرىلگەن، بىراق ول قابىلدانعان جوق. كۇنى بۇگىنگە دەيىن ەشبىر تەرگەۋ ارەكەتى جۇرگىزىلمەگەنىن ايتقان ەۆگەني جوۆتيس «جۋرناليست قۇقىقتارى» ماسەلەسىندە ءالى كۇنگە دەيىن «ءاي دەيتىن اجە، قوي دەيىن قوجا» بولماي تۇر دەيدى.

جيىندا ءسوز بوستاندىعى ماسەلەسىن تىلگە تيەك ەتىپ، پرەزيدەنت قاسىم-جومارت توقاەۆقا ۇندەۋ جولداعان قورعاۋشى ايمان وماروۆا: «بۇل جۋرناليستەگە قارسى جاسالعان قىلمىس. بۇل قازاقستاننىڭ ءيميدجىن قۇرتادى، بۇل ەلدە ءسوز بوستاندىعى جوق ەكەنىن كورسەتەدى»،– دەدى.

سوڭعى ۋاقىتتارى ەلىمىزدە جۋرناليستەردىڭ جۇمىسىنا كەدەرگى كەلتىرۋ وقيعالارى جيىلەپ كەتتى. كوپشىلىك جۇرت مۇنى بيلىك ترانزيتىمەن بايلانىستىرۋدا. وسىعان دەيىن «شەكاراسىز تىلشىلەر»، «جۋرناليستەردى قورعاۋ كوميتەتى» (Committee to Protect Journalists, CPJ) سىندى حالىقارالىق ۇيىمدار قازاقستانداعى ءسوز بوستاندىعى، باق وكىلدەرىنە كورسەتىلەتىن قىسىم، ينتەرنەتتىڭ بۇعاتتالۋىن بىرنەشە مارتە سىنعا الىپ، بيلىككە ۇندەۋ-حات جولداعان. قازىرگى ۋقاقىتتا RSF حالىقارالىق ۇيىمىنىڭ رەيتينگىسىندە ءسوز بوستاندىعى بويىنشا قازاقستان 180 ەلدىڭ ىشىندە 158-ورىندا تۇر.

"The Qazaq Times"