فوتو: قازاقپارات

27 قاڭتاردا قازاقستان پرەزيدەنتى قاسىم-جومارت توقاەۆ بىرىككەن اراب امىرلىكتەرىنە رەسمي ساپارمەن بارعان. جوسپار بويىنشا تاراپتار 11 ملرد دوللاردىڭ ينۆەستيتسيالىق جوبالارىن جۇزەگە اسىرماق.

كەزدەسۋ بارىسىندا بىرقاتار قۇجاتتارعا قول قويىلىپ، بيزنەس وكىلدەرىمەن جيىندار وتكىزىلدى. اتاپ ايتقاندا، قر ساۋدا جانە ينتەگراتسيا مينيسترلىگى مەن ءباا ەكونوميكا مينيسترلىگى اراسىنداعى ءوزارا تۇسىنىستىك تۋرالى مەموراندۋمعا قول قويىلدى. «استانا» حالىقارالىق قارجى ورتالىعىنىڭ قارجىلىق قىزمەت كورسەتۋدى رەتتەۋ جونىندەگى كوميتەتى مەن ءباا ورتالىق بانكى اراسىنداعى ءوزارا تۇسىنىستىك تۋرالى مەموراندۋم قابىلداندى.

سونىمەن قاتار، قر ەنەرگەتيكا مينيسترلىگى مەن ءباا ەنەرگەتيكا جانە ونەركاسىپ مينيسترلىگى اراسىندا مۇناي-حيميا ونەركاسىبى سالاسىنداعى ءوزارا تۇسىنىستىك پەن ىنتىماقتاستىق تۋرالى مەموراندۋم جاسالدى. قازاقستان تاراپىنان قۇجاتقا ەنەرگەتيكا ءمينيسترى نۇرلان نوعاەۆ، ال امىرلىكتەر تاراپىنان ەنەرگەتيكا جانە ونەركاسىپ ءمينيسترى سۋحەيىل ءال-مازۋري قول قويدى.

قازاقستان پرەزيدەنتى: «ءبىزدىڭ ىنتىماقتاستىعىمىز كوپقىرلى قارىم-قاتىناس پەن ءارتۇرلى باعىتى جاعىنان ۇلگى بولا الادى. امىرلىكتەر - وسى ايماقتاعى باستى سەرىكتەسىمىز. 2019 جىلدىڭ قاڭتار-قاراشا ايلارى ارالىعىندا ءبىزدىڭ تاۋار اينالىمىمىز وتكەن جىلدىڭ سايكەس كەزەڭىمەن سالىستىرعاندا 10%-عا ارتىپ، 500 ميلليون اقش دوللارى بولدى»، – دەدى.

2018 جىلى ءباا مەن قازاقستاننىڭ ساۋ­دا اينالىمى 490 ملن اقش دوللارىن قۇرا­سا، 2019 جىلدىڭ قاڭتار-قاراشا ارا­­لى­عىندا 500 ملن اقش دوللارىنان اسقان. سونىمەن قاتار، ەكى ەل اراسىندا قول قويىلعان ين­ۆەس­تيتسيالاردى ىنتالاندىرۋ جانە ءوزارا قورعاۋ تۋرالى كەلىسىمنىڭ ارقا­سىن­دا ينۆەستورلار ۇزاق مەرزىمدى تۇراق­تىلىقپەن قامتاماسىز ەتىلدى. وسى ۋاقىتقا دەيىن ەلىمىز­دىڭ ەكونوميكاسىنا امىرلىكتەردەن تارتىلعان تىكەلەي ينۆەستيتسيالار كولەمى 2,1 ملرد اقش دوللاردان استى. وسى جىلدىڭ ماۋسىم-شىلدە ايلارىندا قۇرىلىسى تولىعىمەن اياقتالاتىن «ءابۋ دابي پلازا» كوپ­فۋنك­تسيونالدىق كەشەنى جوباسىنا ءامىر­لىكتەر تاراپى 1,2 ملرد اقش دوللارىنان استام ينۆەستيتسيا سالعان.

"The Qazaq Times"