فوتوكوللاج: https://im.haberturk.com

اقش يراننىڭ سانكتسيالىق ءتىزىمىن كەڭەيتتى. بۇل تۋرالى اقش قارجى مينيسترلىگى شەتەلدىك اكتيۆتەردى باقىلاۋ باسقارماسىنىڭ (OFAC) مالىمدەمەسىندە ايتىلعان.

سانكتسيالىق تىزىمگە يران جانە قىتاي ازاماتى ەنگىزىلدى. سونىمەن قاتار، شەكتەۋ شارالارى التى كومپانياعا: ءباا-ءنىڭ ءبىر كومپانياسى جانە بەس قىتايلىق كومپانياعا قاتىستى ەنگىزىلەدى.

ۆەدومستۆو تاراتقان مالىمدەمەدە: «باسقارما ۇلتتىق يران مۇناي كومپانياسى (NIOC) ەكسپورتىنىڭ جۇزدەگەن ميلليون دوللار ترانزيتىنە قاتىسقان مۇناي-حيميا جانە مۇناي كومپانيالارىنا قارسى سانكتسيالار ەنگىزەدى. يراننىڭ مۇناي سالاسى يسلام رەۆوليۋتسياسى كۇزەتىنىڭ كورپۋسىن قارجىلاندىرادى جانە وعان تەرروريستىك توپتار جاقىن. بۇل يراندىق رەجيمنىڭ تاياۋ شىعىستاعى زۇلىمدىق فۋنكتسياسىن قارجىلاندىراتىن نەگىزگى تابىس كوزى. سانكتسياعا ىلىككەن كومپانيالار يران مۇناي ەكسپورتىنا اقش-تىڭ ەكونوميكالىق سانكتسيالارىن بۇزۋعا كومەكتەسىپ وتىر»، – دەلىنگەن.

تىزىمدەگى جەكە تۇلعالار مەن كومپانيالاردىڭ بارلىق مەنشىگى مەن مۇلىكتەرى اقش اۋماعىندا بۇعاتتالادى. امەريكالىق ازاماتتارعا ولارمەن بايلانىس ورناتۋعا قاتاڭ تىيىم سالىنادى.

11 قاڭتاردا ۋاشينگتون يرانعا ەكونوميكالىق سانكتسيا ەنگىزگەن بولاتىن. قاتاڭ قاۋلىعا ىلىككەندەر قاتارىندا يران ۇلتتىق قاۋىپسىزدىك كەڭەسىنىڭ حاتشىسى الي شامحاني، يران كارۋلى كۇشتەرى قولباسشىسىنىڭ ورىنباسارى رەزا اشتياني، يسلام رەۆوليۋتسياسى كورپۋسىنىڭ «باسيدج» جاساعىنىڭ باسشىسى گولەمرەزا سۇلەيماني بار. ۋاشينگتون قىتاي مەن سەيشەل ارالدارىندا ورنالاسقان 17 تاۋ-كەن جانە مەتالل كومپانياسىنا، مەتالل ساۋداسىمەن اينالىسقان كەمەگە دە سانكتسيا سالدى.

سانكتسيادان بولەك، اق ءۇي باسشىسى دونالد ترامپ يران رەجيمىنىڭ قوسىمشا تابىس كوزدەرىنە شەكتەۋ قويدى.

"The Qazaq Times"