شىمكەنتتىڭ سۋ جاڭا اكىمى مۇرات ايتەنوۆ. فوتو: اشىق دەرەككوز

مەملەكەت باسشىسىنىڭ جارلىعىمەن 2019 جىلدىڭ 30 شىلدەسىنەن بەرى شىمكەنت قالاسىنىڭ اكىمى بولعان ەرلان قۋانىشۇلى ايتاحانوۆ قىزمەتىنەن بوساتىلدى. ونىڭ ورنىنا مۇرات ايتەنوۆ تاعايىندالدى.

پرەزيدەنت توقاەتۆىڭ جارلىعىمەن جانە قالالىق ءماسليحاتتىڭ كەلىسىمىمەن مۇرات دۇيسەنبەكۇلى ايتەنوۆ شىمكەنت قالاسىنىڭ اكىمى بولىپ تاعايىندالدى. مۇرات دۇيسەنبەكۇلى ايتەنوۆ 1981 جىلى 30 قازاندا وڭتۇستىك قازاقستان وبلىسى جەتىساي قالاسىندا دۇنيەگە كەلدى. 2004 جىلى س.م. شتەمەنكو اتىنداعى كراسنودار اسكەري ينستيتۋتىن «ۇيىمداستىرۋ جانە اقپاراتتى قورعاۋ تەحنولوگياسى» ماماندىعى بويىنشا بىتىرگەن. 2011 جىلى قازتۇتىنۋ وداعىنىڭ قاراعاندى ەكونوميكالىق ۋنيۆەرسيتەتىن «زاڭتانۋ» ماماندىعى بويىنشا اياقتاعان. ەڭبەك جولىن استانا قالاسىندا 2004 جىلى قازاقستان رەسپۋبليكاسى قورعانىس مينيسترلىگى جانىنداعى ارنايى بايلانىس ءبولىمىنىڭ كەزەكشىلىك اۋىسىمىنىڭ اعا ينجەنەر-باستىعى بولىپ باستاعان. 2006-2008 جىلدارى – «استانا-ءونىم» اق شارۋاشىلىق اۋلاسىنىڭ مەڭگەرۋشىسى. 2008-2010 جىلدارى – ۆەدومستۆولىق قاراستى ۇيىمداردى باسقارۋ جونىندەگى ءبولىمنىڭ وندىرىستىك قىزمەتتى ۇيلەستىرۋ سەكتورىنىڭ ساراپشىسى. 2010-2012 جىلدارى – قازاقستان رەسپۋبليكاسى پرەزيدەنتى ءىس باسقارماسىنىڭ رەسمي ءىس-شارالار جانە سىرتقى بايلانىستار ءبولىمى مەڭگەرۋشىسىنىڭ ورىنباسارى. 2012-2013 جىلدارى – وسى باسقارمانىڭ رەسمي ءىس-شارالار جانە سىرتقى بايلانىستار ءبولىمىنىڭ مەڭگەرۋشىسى. 2013-2016 جىلدارى اپپارات باسشىسى لاۋازىمىنا تاعايىندالدى. 2017-2019 جىلدارى قر پرەزيدەنتى ءىس باسقارۋشىسىنىڭ ورىنباسارى، 2019 جىلعى جەلتوقساننان بەرى شىمكەنت قالاسى اكىمىنىڭ ءبىرىنشى ورىنباسارى بولعان.

"The Qazaq Times"