شىمكەت قالاسىگنىڭ اكىمى مۇرات ايتەنوۆ. فوتو: ورتالىق كوممۋنيكاتسيالار قىزمەتىندە وتكەن بريفينگتىڭ ۆيدەوسىنان سكرينشوت

شىمكەنتتەگى ناۋرىز تويىنىڭ داۋلى بيۋدجەتىنە قاتىستى سۇراققا قالا اكىمى مۇرات ايتەنوۆ جاۋاپ بەردى. ءۇش اي بۇرىن مەملەكەتتىك ساتىپ الۋ پورتالىنداعى رەسمي دەرەكتەردى نەگىزگە العان جۋرناليستەر مەن بەلسەندىلەر ءانشى ساكەن مايعازيەۆ باسقاراتىن شىمكەنت قالالىق مادەنيەت ءۇيىنىڭ ناۋرىزعا ارنالعان ءىس-شارالارعا 595 ملن تەڭگە قارجى بولگەنىن انىقتاعان. سول كەزدە بۇل وقيعا قوعامدا ۇلكەن شۋ تۋدىرعان ەدى.

ايتەنوۆتىڭ ايتۋىنا قاراعاندا، جۋرناليستەر ناۋرىزعا ءبولىندى دەگەن 595 ملن تەڭگە "جىل بويى وتەتىن وزگە دە ءىس-شارالارعا قاراستىرىلعان".

"قاتەلىك ءتيىستى قىزمەتكەرلەردەن. جىل بويىنا دەپ بولىنگەن قارجاتتى پورتالعا تەك قانا نارۋىزعا دەپ ەنگىزگەن. سونىڭ سالدارىنان وسىنداي جاعداي بولدى. بۇل ادامنىڭ قاتەلىگى بولعاندىقتان، ول ءتيىستى جازاسىن الادى" دەدى ايتەنوۆ ورتالىق كوممۋنيكاتسيالار قىزمەتىندە وتكەن بريفينگتە Qazaq Times ءتىلشىسىنىڭ سۇراعىنا بەرگەن جاۋابىندا.

شىمكەنت قالاسىنىڭ اكىمى م.ايتەنوۆتىڭ ناۋرىز تويىنىڭ بيۋدجەتىنە قاتىستى سۇراقتارعا بەرگەن تولىق جاۋابى

 

ايتەنوۆتىڭ "ناۋرىزعا 213 ملن تەڭگە ءبولىندى، 595 ملن تەڭگە جىل بويى وتەتىن ءىس-شارالار ءۇشىن قاراستىرىلعان" دەگەنى مەملەكەتتىك ساتىپ الۋ پورتالىنداعى رەسمي دەرەككە قايشى. ويتكەنى شىمكەنت قالالىق مادەنيەت ءۇيىنىڭ جىل باستالعالى مەرەكەلىك ءىس-شارالار ءۇشىن جاساسقان كەلىسىمشارتتارىنىڭ جالپى قۇنى قازىردىڭ وزىندە 680 ملن تەڭگەدەن اسىپ كەتتى. مەملەكەتتىك ساتىپ الۋ پورتالىنداعى مالىمەتكە قارعاندا، شىمكەنت اكىمدىگى مەرەكەلىك ءىس-شارالارعا 2021 جىلى 800 ملن تەڭگەدەن استام قاراجات جۇمساۋدى جوسپارلاپ وتىر.

شىمكەنتتە ناۋىرزعا وراي وتكەن ءىس-شارانىڭ ءبىرى - "مۋزارت" توبىنىڭ كونتسەرتى. بۇل كونتسەرتكە قارجى بولگەن قالالىق مادەنيەت ءۇيىن اتالعان توپتىڭ ءانشىسى ساكەن مايعازيەۆ باسقارادى. وسى ماسەلگە قاتىستى ءتىلشى "مايعازيەۆتىڭ ءوزى ءان ايتاتىن توپتىڭ كونتسەرتى ءۇشىن ءوز باسقاراتىن مەملەكەتتىك مەكەمە بيۋدجەتىنەن قارجى بولگەنى قانشالىقتى زاڭدى؟" دەگەن سۇراعىنا ايتەنوۆ ماردىمدى جاۋاپ بەرە المادى. ول مايعازيەۆتىڭ ءوز توبىنىڭ كونتسەرتى ءۇشىن قارجى بولگەنى "زاڭ تالاپتارىن بۇزعان جوق" دەگەنگە ساياتىن پىكىر ايتتى.

"The Qazaq Times"