قازاقستاندا ۇبت باستالدى

قازاقستاندا ۇلتتىق بىرىڭعاي تەستىلەۋدىڭ العاشقى كەزەڭى باستالدى. 16-20 قاڭتار ارالىعىندا 95 مىڭنان استام ۇمىتكەر ۇبت تاپسىرادى.

نەگىزىنەن تەست تاپسىرۋ فورماتى وزگەرگەن جوق. بىراق بيىلدان باستاپ جوعارى وقۋ ورنىنا اقىلى نەگىزدە ءتۇسۋ ءۇشىن ۇبت جىلىنا 4 رەت وتكىزىلەدى (قاڭتار، ناۋرىز، ماۋسىم جانە تامىز). وقۋعا تۇسۋشىلەر ءبىلىم گرانتى كونكۋرسىنا قاتىسۋ ءۇشىن ماۋسىمدا وتەتىن ۇبت-نى تاپسىرۋى قاجەت. ۇبت-عا قاتىسۋ ءۇشىن قۇجاتتار 2019 جىلى 1-15 جەلتوقسان ارالىعىندا بىرىڭعاي اقپاراتتىق جۇيە ارقىلى قابىلداندى. ناتيجەسىندە، ۇبت-عا قاتىسۋعا 95 مىڭنان استام ادام ءوتىنىش بەردى. ونىڭ ىشىندە 75 520 وقۋشى تەستىلەۋدى قازاق تىلىندە، 22 744 بالا – ورىس تىلىندە جانە 176 بالا اعىلشىن تىلىندە تاپسىرادى.

تەست تاپسىرۋ كەزىندە وڭىرلەرگە قر ءبىلىم جانە عىلىم مينيسترلىگىنىڭ 447 وكىلى جىبەرىلەدى، اپەللياتسيالىق كوميسسيالار قۇرىلادى، مەديتسينالىق كومەك كورسەتۋ بەكەتتەرى ۇيىمداستىرىلادى جانە تەستىلەۋ بارىسىنداعى قاۋىپسىزدىك قامتاماسىز ەتىلەدى. بۇدان بولەك، قاجەت بولعان جاعدايدا جەكە كومەكشىلەر، سونداي-اق ەرەكشە ءبىلىم بەرۋ قاجەتتىلىگى بار بالالارعا ارنالعان سۋردواۋدارماشىلار ۇسىنىلادى. جەرگىلىكتى جەرلەردە ۇبت ۇيىمداستىرۋ جانە وتكىزۋ بويىنشا مەملەكەتتىك كوميسسيالار قۇرىلعان. مەملەكەتتىك كوميسسيا قۇرامىنا وبلىستار نەمەسە رەسپۋبليكالىق ماڭىزى بار قالالار اكىمدىكتەرىنىڭ وكىلدەرى، قۇقىق قورعاۋ ورگاندارىنىڭ، قوعامدىق ۇيىمداردىڭ، بۇقارالىق اقپارات قۇرالدارىنىڭ وكىلدەرى كىردى.

"The Qazaq Times"