وسكەمەندە جوعارى دەڭگەيدەگى اۋانىڭ لاستانۋى تاعى دا قايتالاندى. بۇل تۋرالى «قازگيدرومەت» رمك وبلىستىق فيليالى حابارلادى.

8-13 قاڭتار ارالىعىندا وسكەمەن قالاسىندا اۋانىڭ جوعارى دەڭگەيدەگى لاستانۋى تىركەلگەن. ناقتى ايتقاندا، زياندى زاتتاردىڭ رۇقسات ەتىلگەن كونتسەنتراتسياسى تومەندەگىدەي وسكەن:
– كومىرتەگى توتىعى – 4,1-گە دەيىن;
– ازوت ديوكسيدى – 2,1-گە دەيىن;
– كۇكىرت ديوكسيدى – 1,8-گە دەيىن;
– كۇكىرتتى سۋتەك – 4,8 -گە دەيىن ارتقان.

31 جەلتوقساننان 7 قاڭتارعا دەيىنگى ارالىقتا وسكەمەندە جوعارى دەڭگەيدەگى اۋانىڭ لاستانۋى تىركەلگەن.

اۋا لاستانۋى سالدارىنان قوعامعا كەلەر زيان وراسان. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە قارايتىن بولساق، «جانسىز جەندەت» اتالاتىن لاستانعان اۋا جىلىنا 7 ملن ادامنىڭ جانىن جالمايدى ەكەن. ياعني، اۋانىڭ لاستانۋىنان كەلىپ شىققان اۋىرۋلار ءار جىلى وسىنشا ادامنىڭ كوز جۇمۋىنا سەبەپ بولادى.

وسىعان دەيىن لاستانعان اۋادا دەم الۋ تىنىس جولى اۋرۋلارىنا شالدىقتىرادى جانە ادامنىڭ ەرتە قارتايۋى مەن جاسىنا جەتپەي الجىپ قالۋىنا سەبەپ بولادى دەلىنىپ كەلگەن. الايدا، جاڭا زەرتتەۋلەر اۋانىڭ لاستانۋىنان كەلەتىن قاتەرلەردىڭ ءبىز ويلاعاننان دا كوپ ەكەنىن كورسەتتى.

كەزەكتى زەرتتەۋدى عالىمدار 2010-2014 جىلدار ارالىعىندا ون جاستان جوعارى ادامدار اراسىندا 24 ماتەماتيكالىق سۇراق، 34 تانىمدىق سۇراق قويۋ ارقىلى جۇرگىزگەن. ناتيجەسىندە، لاس اۋادا جاساعان ادامداردىڭ بارعان سايىن تانىمدىق، ويلاۋ قابلەتتەرى تومەندەپ، ءبىلىم-قابىلەتى السىرەيتىنى بەلگىلى بولعان.

"The Qazaq Times"