فوتو: ۆۆس

8 قاڭتاردا تەھراننان كيەۆكە باعىت العان ۇشاق اپاتىنىڭ تەحنيكالىق اقاۋدان بولعانى حابارلاندى. بىراق اقش پەن يران اراسىنداعى قاقتىعىس كەزىندە ورىن العان ءىرى اپات جونىندە باسقا دا بولجامدار بار.

جولاۋشىلار ۇشاقتارىنىڭ قوزعالىسىن باقىلايتىن Flightradar24 سايتى «Boeing» تەھراننان جەرگىلىكتى ۋاقىت بويىنشا 2:42-گە ۇشىپ كوتەرىلگەنىن جانە ول تۋرالى سوڭعى اقپارات ەكى مينۋت وتكەن سوڭ 2:44-دە الىنعانىن حابارلادى. قازىرگى ۋاقىتتا اپات سەبەبى جونىندە ءتورت بولجام بار: زىمىرانمەن اتىپ ءتۇسىرۋ، بورت ىشىندەگى تەراكت، ۇشاق موتورىنىڭ جانۋى نەمەسە ۇشقىشسىز ۇشاقپەن سوقتىعىسۋ.

امەريكا، كانادا جانە ۋكراينا لاينەرگە يران زىمىرانى ابايسىزدا تيگەن بولۋى مۇمكىن دەيدى. اقش پرەزيدەنتى دونالد ترامپ ۇشا اپاتى تەحنيكالىق اقاۋدان بولدى دەگەنگە كۇدىكپەن قارايدى. ترامپ: «مەنىڭ ءوز بولجامىم بار. بۇل ورنى تولماس ۇلكەن قايعى. ۇشاق قاۋىپتى ايماقتا كەتىپ بارا جاتقان. كەيبىرەۋلەر اپاتقا تەحنيكالىق اقاۋ سەبەپ دەيدى. بىراق مەن بۇل پىكىرمەن كەلىسپەيمىن. بارلىعىنا كوز جەتكىزۋ ءۇشىن يران تاراپى Boeing-ءتىڭ قارا جاشىكتەرىن وقۋدى وزگە ەلدەرگە بەرۋ كەرەك. مىسالى، فرانتسيالىق نەمەسە كانادالىق مامانداردىڭ كومەگىنە سۇيەنۋ كەرەك»، – دەيدى. الايدا قارا جاشىك بۇلىنگەن.

فوتو: ۆۆس

ۋكراينانىڭ ۇلتتىق قاۋىپسىزدىك جانە قورعانىس كەڭەسى ۇشاققا رەسەيدە جاسالعان «تور» زەنيتتىك-راكەتكالىق كومپلەكسىنەن جىبەرىلگەن زىمىران ءتيۋى مۇمكىن دەيدى. تەھرانعا بارعان ۋكراينالىق ماماندار يران بيلىگىمەن اپات ورىن العان جەرگە بارىپ، زەرتتەۋ جۇرگىزبەك.

اپاتتىڭ سەبەپ-سالدارىنا كانادا بيلىگى دە كۇدىك كەلتىرىپ وتىر. پرەمەر-مينيستر دجاستين تريۋدو: «قولدا بار مالىمەتتەرگە قاراعاندا، ونىڭ ىشىندە ءبىزدىڭ وداقتاس ەلدىڭ بارلاۋ قىزمەتتەرىنىڭ اقپارلارى دا بار، ۇشاق يراننىڭ زىمىرانىمەن اتىپ تۇسىرىلگەن. ايعاقتار جەر اۋا ساناتىنا جاتاتىن زىماران قولدانىلعانىن كورسەتەدى»، – دەگەن مالىمدەمە جاسادى. كانادا «وقيعانىڭ انىق-قانىعىنا كوز جەتكىزبەيىنشە تىنىشتالمايمىز» دەپ وتىر.

ال يراننىڭ ازاماتتىق اۆياتسيا ۇيىمى بۇل بولجامدى «نەگىزسىز» دەپ جوققا شىعارۋدا. تەھراننىڭ مالىمدەۋىنشە، اۋە كولىگى كوكتە تەحنيكالىق اقاۋدان جانىپ بارىپ جەرگە قۇلاعان. يران تارابىنىڭ حابارلاۋىنشا، ۇشاق موتورى جانىپ، پيلوتتار ۇشاققا يە بولا الماي قالعان. جەرگىلىكتى باق «ۇشاق راداردان جوعالىپ كەتكەندە 2500 مەتر بيىكتىكتە بولعان. پيلوتتار ەشقانداي توتەنشە جاعداي جايلى حابارلاماعان، بىراق قايتا اۋەجايعا ورالۋعا تىرىسقان» دەپ جازدى.

تەھرانداعى يمام حومەني حالىقارالىق اۋەجايى ماڭىندا اپاتقا ۇشىراعان Boeing 737 بورتىنداعى 176 جولاۋشىنىڭ ءبارى كوز جۇمدى. رەسمي مالىمەتتەر بويىنشا، بورتتا 82 يراندىق، 63 كانادالىق، 10 شۆەد، 4 اۋعان، 3 بريتاندىق جانە گەرمانيانىڭ 3 ازاماتى بولعان. ۋكراينا ءسىم وكىلدەرى 11 ۋكرايندىقتىڭ اراسىندا ەكيپاجدىڭ توعىز مۇشەسى بار دەپ حابارلادى. ۇشاق «ۋكراينا حالىقارالىق اۋە جولدارى» اۋەكومپانياسىنا تيەسىلى.

يران بيلىگى قارا جاشىكتى بەرۋدەن باس تارتىپ وتىر. حالىقارالىق ەرەجەلەر بويىنشا يران ءوز بەتىنشە تەرگەۋ جۇرگىزۋگە قۇقىلى. بىراق اپات جونىندە ەكىۇدايى بولجامدار بولعاندىقتان، بۇل ءىستى شەتەلدىك ماماندار دا زەرتتەيدى. ادەتتە مۇنداي جاعدايدا قۇلاعان ۇشاقتى دايىنداۋشى كومپانيا دا جاۋاپقا تارتىلادى.

"The Qazaq Times"