«دەمپارتيا» ميتينگىسىنە ءبىر كۇن قالعاندا ۇيىم بەلسەندىسى 15 تاۋلىككە قامالدى

تىركەلمەگەن «دەمپارتيا» ميتينگىسىنە ءبىر كۇن قالعاندا پارتيا بەلسەندىسى ىرىسبەك توقتاسىننىڭ 15 تاۋلىككە قامالعانى حابارلاندى. بۇل جايلى 17 قىركۇيەك كۇنى ادام قۇقىقتارى جونىندەگى حالىقارالىق بيۋرونىڭ قىزمەتكەرى، جۋرناليست ينگا يمانباي Facebook-تاعى پاراقشاسىندا جازدى. 

«ءتىلدى، تاۋەلسىزدىك پەن ەلدىكتى قورعاۋ ءۇشىن ميتينگ جاريالاعان دەموكراتيالىق پارتيا بەلسەندىلەرىنە قىسىم باستالدى. تۇندە ىرىسبەك توقتاسىندى ميتينگكە شاقىرعانى ءۇشىن دەپ ۇيىنەن الىپ كەتىپ، تۇنگى ەكىدە سوت وتكىزىپ، 15 تاۋلىككە قاماپ تاستاپتى» دەپ جازدى ينگا يمانباي.

بەلسەندىگە ادۆوكات پەن تۋىستارىنا بايلانىسۋعا مۇمكىندىك بەرىلمەگەن. ونىڭ قازىر قايدا ەكەنى ازىرگە بەلگىسىز.

«دەموكراتيالىق پارتيا بەلسەندىسى ىرىسبەك توقتاسىننىڭ قايدا ەكەنىن تاپپاي قالدىق. ادۆوكات جانارا بالعاباەۆا الماتى قالاسىنداعى بارلىق ۋاقىتشا ۇستاۋ مەكەمەسىنە حابارلاسىپ شىقتى. بارلىعى دا بىزدە جوق دەيدى. سوندا تۇنگى ەكىدە پوليتسيا ۇستاپ الىپ كەتكەن بەلسەندى قازىر قايدا؟»، – دەپ جازدى جۋرناليست Facebook جەلىسىندە.

يمانباي سانكتسيالانباعان ميتينگ قارساڭىندا ۇيىم جەتەكشىسى جانبولات ماماي، ابزال دوستياروۆ جانە نۇربول بايتەرەكەوۆتىڭ «بىرنەشە كولىك ىزىنە ءتۇسىپ اڭدىعانىن، قىسىم جاسالعانىن» حابارلادى. قۇقىق قورعاۋشىنىڭ ايتۋىنشا، بايتەرەكوۆتىڭ ۇيىنە قاراساي اۋداندىق پوليتسيا باسقارماسىنان قىزمەتكەرلەر كەلىپ، شاقىرتۋ قاعازىنسىز باسشىعا كەلۋىن سۇراعان. بىراق بەلسەندى زاڭدى شاقىرتۋسىز بارمايتىنىن ەسكەرتىپ، بارۋدان باس تارتقان.

ازاماتتىق بەلسەندى ىرىسبەك توقتاسىن بۇعان دەيىن دە بىرنەشە مارتە اكىمشىلىك جازاعا تارتىلىپ، 10, 15 تاۋلىككە قامالعان. ول سوڭعى رەت بيىل شىلدەدە قازاقستاننىڭ ەكس-پرەزيدەنتى نۇرسۇلتان نازارباەۆتىڭ تۋعان كۇنى قارساڭىندا وتكەن «دەمپارتيانىڭ» قارسىلىق اكتسياسى كەزىندە ۇستالىپ، «ۇساق بۇزاقىلىق» بابى بويىنشا جازاعا تارتىلعان ەدى.

تىركەلمەگەن «دەمپارتيا» ليدەرى جانبولات ماماي جانە ۇيىمنىڭ تاعى بىرنەشە بەلسەندىسى جاقتاستارىن 18 قىركۇيەك كۇنى الماتىداعى ميتينگىگە كەلۋگە شاقىرعان. ولار قارسىلىق شاراسىندا ءتىل ماسەلەسىن، ساياسي تۇتقىندار ماسەلەسىن كوتەرەتىنىن مالىمدەگەن.

The Qazaq Times