اقش پرەزيدەنتى دونالد ترامپ رەسپۋبليكالىقتار مەن دەموكراتتار جيىنىندا. فوتو: https://images.thestar.com

اقش سەناتىندا يراننىڭ امەريكالىق اسكەري بازالارعا شابۋىلىنا بايلانىستى جابىق ءباسپاسوز ءماسليحاتى ءوتتى. بۇل تۋرالى Reuters اگەنتتىگى حابارلادى.  

جيىندا اقش مەملەكەتتىك حاتشىسى مايك پومپەو، قورعانىس ءمينيسترى مارك ەسپەر سەناتورلارعا يراكتا بولعان جاعداي جونىندە مالىمدەمە جاسادى. ورتالىق بارلاۋ باسقارماسىنىڭ باسشىسى دجينا حاسپەلدىڭ ايتۋىنشا، امەريكالىق اسكەريلەر يراننىڭ شابۋىل جاسايتىنىن الدىن الا جەرسەرىك ارقىلى انىقتاپ، دەر كەزىندە دايىندالىپ ۇلگەرگەن. وسىلايشا ادام شىعىنىن بولدىرماۋعا قول جەتكىزگەن.

دەگەنمەن، اق ءۇي باسشىسى ترامپ پەن سەناتورلار رەسمي وكىلدەردىڭ مالىمدەمەسىنە كوڭىل كونشىتەرلىك جاۋاپ قاتقان جوق. اقش سەناتورى چاك شۋمەر: «ءباسپاسوز ءماسليحاتىندا كوپ سۇراقتارعا جاۋاپ بەرىلمەدىى. اكىمشىلىكتىڭ الداعى جوسپارىنا كوڭىلىمىز تولعان جوق. سەنتورلاردىڭ ساۋالى كوبەيگەن كەزدە شەنەۋنىكتەر ءباسپاسوز ءماسليحاتىن توقتاتىپ كەتىپ قالدى. سوندىقتان بۇل لاۋازىمدى تۇلعالار 1 اپتا ىشىندە قايتا كەلىپ، جاعدايدى تولىق ءتۇسىنىدىرۋىن سۇرايمىن»، – دەيدى.

يسلام رەۆوليۋتسياسى ساقشىلار كورپۋسىنىڭ «قۇدس كۇشتەرى» ارنايى جاساعىنىڭ قولباسشىسى سۇلەيماني 3 قاڭتاردا باعداتتاعى اقش-تىڭ اۋە شابۋىلى كەزىندە مەرت بولعان. ونى ولتىرۋگە اقش پرەزيدەنتى دونالد ترامپ بۇيرىق بەرگەن. «قۇدس كۇشتەرى» يراننىڭ سىرتتاعى اسكەري وپەراتسيالارىنا قاتىسقان. وسى جاعدايدان كەيىن ەكى ەل بايلانىسى ۋشىعىپ كەتتى.

8 قاڭتاردا يراكتاعى اقش بازاسىنا يران تاراپىنان زىمىرانمەن شابۋىل جاسادى. رەسمي تەھران شابۋىلدا 80 امەريكالىق سارباز كوز جۇمدى دەسە، ۋاشينگتون اسكەرلەر زارداپ شەككەن جوق دەگەن مالىمدەمە جاسادى.

"The Qazaq Times"