اقش پرەزيدەنتى دونالد ترامپ امەريكا مەن يران قاقتىعىسىنا بايلانىستى حالىققا ۇندەۋ جولدادى. اق ءۇي باسشىسىنىڭ رەسمي مالىمدەمەسىن «White House» تىكەلەي ەفيردەن كورسەتتى.

ترامپ ءوزىنىڭ 9 مينۋتتىق جولداۋىندا يرانعا قارسى جاڭادان سانكتسيالار ەنگىزىلەتىنىن، سوڭعى راكەتا شابۋىلىنان اقش اسكەريلەرى زارداپ شەكپەگەنىن ايتتى. سونىمەن قاتار، تەھران يادرولىق امبيتسيالارىنان باس تارتىپ، تەرروريزمگە قولداۋ جاساعاندى دوعارۋى ءتيىس دەپ ەسكەرتتى.

سونىمەن قاتار، ترامپ يران ۇكىمەتىن دايش تەرروريستىك ۇيىمىنا قارسى بىرگە كۇرەسۋگە شاقىرىپ، ناتو-نىڭ تاياۋ شىعىستا الدەقايدا بەلسەندى ءرول ويناۋىن ءوتىندى. ونىڭ سوزىنشە، يرانمەن جاڭا يادرولىق كەلىسىم جاساۋ كەرەك، ال ەۋروپا ەلدەرى مەن رەسەي قازىرگى كەلىسىمنەن باس تارتۋى ءتيىس.

ەكى ەل بايلانىسىن نىعايتقىسى كەلەتىنىن ايتقان ترامپ: «يران حالقى مەن باسشىلىعىنا مىنانى ايتقىم كەلەدى: ءبىز سىزدەردىڭ بولاشاعىڭىز جارقىن بولعانىن قالايمىز. سىزدەر وعان لايىقسىزدار. مەملەكەت وركەندەپ، الەم ەلدەرىمەن ۇيلەسىمدى دوستىق قارىم-قاتىناستا بولسا دەيمىز. امەريكا قۇراما شتاتتارى بەيبىتشىلىككە ۇمتىلعان ءاربىر ەلمەن تاتۋ بولعىسى كەلەدى»، — دەدى.

31 جەلتوقساندا اقش-تىڭ باعداتتاعى ەلشىلىگى الدىندا نارازىلىق شاراسى بولىپ، شەرۋشىلەردىڭ الدى ەلشىلىك عيماراتىنا شابۋىلداعان. امەريكا بۇل نارازىلىقتىڭ ارتىندا يران تۇر دەپ ەسەپتەيدى. نارازىلىق اقش كۇشتەرىنىڭ يراكتاعى جانە سۇرياداعى شابۋىلىندا شيت مۇسىلماندارى قازا تاپقانى تۋرالى مالىمەت تاراعان سوڭ تۇتانعان ەدى.

يسلام رەۆوليۋتسياسى ساقشىلار كورپۋسىنىڭ «قۇدس كۇشتەرى» ارنايى جاساعىنىڭ قولباسشىسى سۇلەيماني 3 قاڭتاردا باعداتتاعى اقش-تىڭ اۋە شابۋىلى كەزىندە مەرت بولعان. ونى ولتىرۋگە اقش پرەزيدەنتى دونالد ترامپ بۇيرىق بەرگەن. «قۇدس كۇشتەرى» يراننىڭ سىرتتاعى اسكەري وپەراتسيالارىنا قاتىسقان. بۇعان دەيىن اقش-تان «كەك الاتىنىن» مالىمدەگەن يران 8 قاڭتاردا اقش-تىڭ يراكتاعى بىرقاتار نىساندارىنزىمىرانمەن اتقىلادى.

"The Qazaq Times"