باق: استانادا نارازى ايەلدەر جاڭا دەپۋتاتتاردىڭ ەل الدىنا شىعۋىن تالاپ ەتتى

بىرنەشە ايدان بەرى الەۋمەتتىك جەلىلەردە ءارتۇرلى نارازىلىق تۋدىرعان زاڭ جوباسىنا بايلانىستى ءبىر توپ ايەل بۇگىن مينيسترلىكتەر ۇيىنە بارعان.

ازاتتىق راديوسىنىڭ حابارلاۋىنشا, دۇيسەنبى كۇنى تاڭدا استانادا ءبىر توپ ايەل «وتباسىنداعى زورلىق-زومبىلىق» تۋرالى زاڭدى ءتۇسىندىرۋدى تالاپ ەتىپ، ەڭبەك جانە ادىلەت مينيسترلىكتەرىنىڭ عيماراتىنىڭ الدىنا جينالعان. ولار شەنەۋنىكتەردىڭ جاۋابىنا قاناعاتتانباعانىن ايتىپ، پارلامەنتكە بەتتەگەن.

الايدا انالار مەن ايەلدەردىڭ الدىن ارنايى جاساق بوگەپ، پارلامەنتكە بارار جولدى جاپقان. اقپارات قۇرالىنىڭ دەرەگىنە قاراعاندا، ول جاقتا 50 شاقتى ارنايى جاساق وكىلى، بىرنەشە اۆتوبۋس تۇرعان.

ايەلدەردى وقيعا ورنىنان اكەتپەك بولعان پوليتسيا ارەكەتىنەن سوڭ ءتارتىپ ساقشىلارى مەن بىرنەشە ايەل جۇلقىلاسىپ قالعان. قالىڭ جاساقتىڭ اراسىنداعى اقجاعالىلارى ايەلدەردى ماسەلەنى «جانۇيا» ورتالىعىندا تالقىلاۋعا كوندىرىپ باعۋدا. بىراق ايەلدەر جەتىنشى شاقىرىلىمداعى جاڭا ءماجىلىس دەپۋتاتتارىنىڭ شىعۋىن تالاپ ەتەدى.

تۇستەن كەيىن نارازىلارمەن سويلەسۋگە قالالىق اكىمدىكتىڭ ىشكى ساياسات باسقارماسىنىڭ جەتەكشىسى داۋرەن بابامۇراتوۆ كەلدى.

– نەگىزىنەن ەكى ماسەلەگە نارازى بولىپ تۇرسىزدار عوي. ءبىرى تۇرعىن ءۇي جاعدايى سايكەس كەلمەسە، وندا بالالاردى تارتىپ الادى-مىس دەگەن جورامال. زاڭدا ونداي تالاپ جوق. بالا بەلگىلى ءبىر جاسقا كەلگەن كەزدە جىنىسىنا قاتىستى وي-پىكىرىن ايتادى-مىس دەگەن نارسە دە زاڭدا قاراستىرىلماعان. ونداي نارسە جوق، – دەپ ەدى ايەلدەر «ونداي نارسە بار!» دەپ ايقايلاپ، شۋلاپ كەتتى دەپ حابارلايدى ازاتتىق.

18 قاڭتار ساعات 14:30-دەگى جاعداي بويىنشا، ايەلدەردىڭ ءبىراز بولىگى تارقاعان، ءبىراز بولىگى دەپۋتاتتارمەن كەزدەسەمىز دەپ مينيسترلىكتەر ءۇيى ماڭىندا قالعان.

بىلتىر قىركۇيەكتە ءماجىلىس 49 باپتان تۇراتىن «وتباسىلىق-تۇرمىستىق  زورلىق-زومبىلىققا  قارسى  ءىس-قيمىل  تۋرالى» زاڭ جوباسىن ءبىرىنشى وقىلىمدا ماقۇلداعان. 18 قاڭتاردا مينيسترلىكتەر ۇيىنە كەلگەن نارازى ايەلدەر زاڭ جوباسىندا بۇلىڭعىر ۇعىمدار كوپ ەكەنىن ايتىپ، ونى ماقۇلداعان جانە ازىرلەگەن شەنەۋنىكتەرمەن كەزدەسكىسى كەلەتىنىن ايتقان.

وتباسى قۇندىلىقتارىنا جانە ىشكى ماسەلەسىنە قاۋىپ-قاتەر توندىرەتىن، «شيكى» تۇستارى كوپ دەپ ءجيى سىنالىپ جۇرگەن قۇجاتقا نارازىلار ارتىپ كەلەدى. زاڭ جوباسىنىڭ تولىق ءماتىنى قولجەتىمسىز. بيلىك تاراپىنان جالپىحالىقتىق دەڭگەيدە اشىق ءتۇسىندىرۋ جۇمىستارى باستالا قويعان جوق.

*اقپارات تولىقتىرىلدى

"The Qazaq Times"