سۋرەتتە: بەلارۋس پرەزيدەنتى الەكساندر لۋكاشەنكو، رەسەي پرەزيدەنتى ۆلاديمير پۋتين، قىرعىزستان باسشىسى سوورونباي جەەنبەكوۆ، قازاقستاننىڭ بۇرىنعى پرەزيدەنتى ن.نازارباەۆ جانە قازىرگى مەملەكەت باسشىسى ق.اسىم-جومارت توقاەۆ. فوتو: http://kazaknews.kz

قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ «پۋتين داۋىرىنە» دەگەن كوزقاراسى مەن پوستكەڭەستىك مەملەكەت باسشىلارىنىڭ قارىم-قاتىناسى جونىندە سۇحباتى رەسەيلىك ريا اگەنتتىگىندە جاريالاندى.

نازارباەۆ ءوزىنىڭ «سەنىمدى سەرىكتەسى» جونىندە: «بوريس ەلتسين ءوز مۇراگەرىن ۇزاق تاڭدادى، ناتيجەسىندە ۆلاديمير ءپۋتيندى سايلادى. ءححى عاسىردىڭ باسىندا كرەملگە بۇرىنعى باسشىلاردىڭ بىرىنە دە ۇقسامايتىن جاڭا ساياساتكەر كەلدى. بىرىنشىدەن، ۆلاديمير ۆلاديميروۆيچ جوعارى دەڭگەيلى ەرۋديت، ەنەرگياسى مول جانە ەڭ كۇردەلى ماسەلەلەردى شەشۋگە دايىن ەكەندىگىن كورسەتىپ، مەنى تاڭقالدىردى. ونىڭ باسشىلىعىمەن رەسەي قايتادان ۇلى دەرجاۆا بولدى. جىل سايىن رەسەيدىڭ قۋاتى مەن حالىقارالىق ىقپالى ارتىپ كەلەدى.

ەكىنشىدەن، ءبىزدىڭ ارامىزدا سەنىمدى قارىم-قاتىناس قالىپتاستى. ءبىزدىڭ ءاربىر كەزدەسۋىمىز بەكىتىلگەن رەگلامەنت شەڭبەرىنەن شىعىپ، حاتتامامەن بەرىلگەن ۋاقىتتان ۇنەمى اسىپ كەتەدى. ءبىز ماسەلەلەردى ءجيى بىرگە تالقىلاپ، پىكىر الماسامىز، ءوز ۇستانىمىمىزدىڭ دۇرىستىعىن دالەلدەۋگە تىرىسامىز. وسى رەتتە «پۋتين ءداۋىرى» اياقتالادى دەپ ايتا المايمىن»، – دەدى.

ءتىلشىنىڭ «وسى ۋاقىت ىشىندە پۋتينمەن ارادا كەلىسپەۋشىلىكتەر بولدى ما؟ ءپۋتيننىڭ ەل مۇددەسى ءۇشىن اتقارىپ وتىرعان ىستەرى سىزگە تولىقتاي ۇناي ما؟» دەگەن ساۋالىنا نازارباەۆ: «پۋتين – پراگماتيكالىق ساياساتكەر. بۇگىندە بىردە-ءبىر ءىرى حالىقارالىق ماسەلە رەسەي فەدەراتسياسىنىڭ پىكىرىن ەسكەرمەي شەشىلمەيدى. دەمەك، بۇل ۆلاديمير ءپۋتيننىڭ ەڭبەگىن مويىنداۋ ەمەس پە؟

قازاقستان مەن رەسەي ۇستانىمدارىنىڭ جاقىندىعىنا قاراماستان، كۇن تارتىبىندە تۇرعان حالىقارالىق ماسەلەلەردى شەشۋدە ءوز كوزقاراسىمىزعا جۇگىنەمىز. قازاقستان مۇنى جاقسى تۇسىنەدى، سوندىقتان دا ءبىز بارلىق كورشىلەرىمىزبەن ءوزارا ءتيىمدى ىنتىماقتاستىق ورناتىپ كەلەمىز»، – دەپ جاۋاپ قاتتى.

رەپليكا. 2018 جىلى ناۋرىزدا وتكەن پرەزيدەنت سايلاۋىندا پۋتين حالىقتىڭ 76,65% داۋىسىمەن ءتورتىنشى رەت رەسەي فەدەراتسياسىنىڭ پرەزيدەنتى اتاندى. بۇعان رەسەيلىك تانىمال فيليسوف جانە الەۋمەتتانۋشى يگور چۋبايس: «پۋتينگە داۋىس بەرگەن ادامدار ەلدىڭ بولاشاعىن ويلامايتىن، وزگەرىستى قالامايتىن كونسەرۆاتورلار. بۇل سايلاۋدا ساياسي باسەكەلەستىك پەن ازاماتتىق بەلسەندىلىك جوق. ونىڭ بارلىعىنىڭ جولى كەسىلگەن. سايلاۋ قورىتىندىسى كوزبوياۋشىلىق جانە وتە ايانىشتى»، – دەگەن پىكىر بىلدىرگەن. قازىرگى ۋاقىتتا شەتەلدىك باسىلىمدار مەن حالىق اراسىندا «پۋتين ءداۋىرىنىڭ» قاشان اياقتالاتىنى جونىندە قىزۋ پىكىرتالاس بولىپ جاتىر.

"The Qazaq Times"