ترامپ يمپيچمەنتى: اقش پرەزيدەنتىنىڭ وكىلەتتىلىگى توقتاتىلا ما؟

اقش پرەزيدەنتى دونالد ترامپ يمپيچمەنت ءراسىمىن ەلدە توڭكەرىس ۇيىمداستىرۋدىڭ امالى دەپ، دەموكراتتاردىڭ وكىلى نەنسي پەلوسيدىڭ ارەكەتىن قاتاڭ سىنعا الدى. بۇل تۋرالى The New York Times حابارلادى.

اق ءۇي باسشىسى سوزىندە: «دەموكراتيالىق پارتيا باستاعان يمپيچمەنت بيلىكتە توڭكەرىس ۇيىمداستىرۋدىڭ ايلاسى دەپ بىلەمىن. وسى امالدارى ءۇشىن الداعى ساياسي دودا كەزىندە جاۋاپقا تارتىلاتىن بولادى. بۇل ادىلەتسىزدىك 3 جىلدان بەرى جالعاسىپ كەلەدى. ەسەسىنە رەسپۋبليكاشىلداردىڭ ىنتىماقتاستىعى ارتا ءتۇستى دەگىم كەلەدى»، – دەدى. ونىڭ ايتۋىنشا، پەلوسي امەريكالىق دەموكراتياعا سوعىس جاريالاپ، ەل كونستيتۋتسياسىنا نۇقسان كەلتىرىپ وتىر. سونىمەن قاتار 2020 جىلى وتەتىن پرەزيدەنتتىك سايلاۋدا جەڭىسكە جەتۋدىڭ امالىن ويلاستىرۋدا.

ەستەرىڭىزدە بولسا، شىلدەدەن بەرى اقش پرەزيدەنتىنە قارسى يمپيچمەنت جاريالاۋ تۋرالى ماسەلەلەر قارالىپ كەلەدى. وندا ترامپ ۋكراينانىڭ جاڭا سايلانعان پرەزيدەنتى ۆلاديمير زەلەنسكيمەن تەلەفون ارقىلى سويلەسكەن كەزدە جو بايدەننىڭ ۇلى حانتەر بايدەننىڭ ۇستىنەن جەمقورلىق ايىبى بويىنشا ءىس قوزعاۋدى تالاپ ەتىپ، ەگەر زەلەنسكي ۇكىمەتى بۇلاي جاساماسا ۋكرايناعا بەرىلەتىن 400 ملن دوللار قۇنىنا يە اسكەري كومەكتى كەشىكتىرەتىنىن ايتقان.

ترامپتىڭ بۇل ارەكەتى «قىزمەت مۇمكىندىگىن پايدالانىپ، ۋكرايناعا قىسىم ءتۇسىردى» دەپ ايىپتالعان بولاتىن. ەگەر وسى ارەكەتى تولىق دالەلدەنسە، وندا اقش پرەزيدەنتىن قىزمەتىنەن قالدىرۋعا تولىق نەگىز بار. سەبەبى، ول ۋكراينادان ايىپتاۋدى تالاپ ەتكەن بايدەن دەموكراتيالىق پارتيانىڭ ۇمىتكەرى جو بايدەننىڭ ۇلى. ترامپ ءوز ارەكەتى ارقىلى قارسىلاسىنىڭ بەدەلىن ءتۇسىرۋدى ماقسات ەتكەن دەگەن بولجامدار دا بار. بىراق، پرەزيدەنت ترامپ ءوز كەزەگىندە اكەلى-بالالى بايدەندەردى زاڭسىز ارەكەتتەرمەن ايىپتاعان. ترامپ بايدەندى قىزمەت مۇمكىندىگىنەن اسىرا پايدالانىپ، ۋكراينا قاۋىپسىزدىك قىزمەتكەرلەرىنە قىسىم ءتۇسىرىپ، ۇلىنا قارسى قىلمىستىق ءىستى كۇشپەن جاپتىرعان دەگەن ايىبىن تاعىپ وتىر.

ترامپتىڭ يمپيچمەنتى سەناتتىڭ ۇشتەن ەكى وكىلى قولداعاندا عانا جۇزەگە اسپاق. بىراق، اقش تاريحىندا بىردە ءبىر پرەزيدەنت قىزمەتىنەن قۋىلىپ كورگەن جوق. 230 جىل ىشىندە تەك ەكى پرەزيدەنتكە عانا يمپيچمەنت جاريالانعان، بىراق ولار ايىپ استىندا ءوز قىزمەتتەرىن جالعاستىرعان. كەيبىر ساراپشىلار وسىلاردى العا تارتا وتىرىپ، سونداي-اق، اقش سەناتىندا قازىرگى كەزدە رەسپۋبليكاشىلداردىڭ ۇستەمدىك قۇرىپ وتىرعانىن ەسكەرە وتىرىپ، ترامپتىڭ قىزمەتتەن قۋىلۋى مۇمكىن ەمەس دەگەن بولجام ايتادى.

وسى ۋاقىتقا دەيىن اقش-تا ەندريۋ دجونسون جانە بيلل كلينتون يمپيچمەنت پروتسەسىنە ۇشىراعان. ەكى پرەزيدەنتتىڭ لاۋازىمىن شەكتەۋ سەناتتاعى تالقىلاۋلاردىڭ قورىتىندىسى بويىنشا اقتالعان. ال امەريكا تاريحىندا «سۇستى ادام» اتانعان ريچارد نيكسون ۋوتەرگەيت جانجالىنا بايلانىستى يمپيچمەنت ارقىلى وتستاۆكاعا كەتكەن بولاتىن.

"The Qazaq Times"