كۇنى كەشە بىرىككەن كورولدىكتە مەرزىمىنەن بۇرىن پارلامەنتتىك سايلاۋ ءوتىپ، exit poll باعالاۋىمەن باسقارۋشى بيلىككە قاراستى كونسەرۆاتورلىق پارتيا جەڭىسكە جەتتى. ەندى پرەمەر-مينيستر بوريس دجونسون ۇزاق ۋاقىت بويى شەشىمىن تاپپاعان Brexit ماسەلەسىنە نۇكتە قويماق.

The Guardian باسىلىمىنىڭ مالىمەتىنشە، بريتانيا 31 قاڭتاردا ەۋرووداق قۇرامىنان كەتۋگە دايىن. سايلاۋدان كەيىن بوريس دجونسون: «ۇكىمەت قۋاتى كۇشتى جاڭا مانداتقا يە بولدى. ەندى برەكسيتتى ەركىن تۇردە جۇزەگە اسىرا الاتىن بولامىز. ەلدى بىرىكتىرىپ، بريتانيالىق حالىقتىڭ مۇددەسى ءۇشىن جۇمىس ىستەيمىز. ەڭ ءبىرىنشى كەزەكتە دەنساۋلىق ساقتاۋ جۇيەسىن دامىتامىز»، — دەپ بىلەك سىبانىپ وتىر.

ال ەكىنشى ورىنعا تۇراقتاعان لەيبوريستەر پارتياسىنىڭ باسشىسى دجەرەمي كوربين: «الداعى ۋاقىتتا وتەتىن جالپى سايلاۋ كومپانيالارىندا پارتياعا باسشىلىق ەتپەيتىندىگىمدى اشىپ ايتقىم كەلەدى. بۇگىنگى ناتيجەلەردى ۇعىنۋعا جانە ودان قورىتىندى شىعارۋعا پارتيالاستارىممەن بىرگە ارەكەت ەتەتىن بولامىن»، — دەيدى.

بۇل تۇستا تاعى ءبىر ماسەلەنى ايتا كەتۋ كەرەك. سولتۇستىك يرلانديانىڭ ەو-عا قاراستى بىرىڭعاي كەدەندىك ايماعىندا قالۋى دجونسون ۇسىنعان Brexit بويىنشا جاڭا جوسپارعا تولىعىمەن قايشى كەلەدى. بريتاندىق پرەمەردىڭ ۇسىنىسى «بەكستوپ» رەجيمىنە بالاما سانالادى. ياعني اتالعان جوسپار ەو مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن كەلىسىمنىڭ بولىگى سانالادى. بىرككەن كورولدىكتىڭ پرەمەرى بوريس دجونسوننىڭ ۇسىنىسىنا سايكەس، سولتۇستىك يرلانديا وتپەلى كەزەڭ وتكەننەن كەيىن كەدەن وداعى قۇرامىنان ءبىرجولاتا شىعادى جانە وسى اۋماقتاعى تاۋارلاردىڭ بارلىق ساناتىنا جاڭادان كەدەندىك رەجيم ەنگىزىلەتىن بولادى.

ۇلىبريتانيا ەو-دان بيىل 29 ناۋرىزدا، ياعني قاۋىمداستىقتان شىعۋ تۋرالى جازباشا حابارلاما بەرىلگەننەن كەيىن ەكى جىل وتكەن سوڭ كەتۋى كەرەك ەدى. الايدا بريتان پارلامەنتى قاۋىمدار پالاتاسىنىڭ دەپۋتاتتارى بريۋسسەل مەن بۇرىنعى پرەمەر-مينيستر تەرەزا مەي ۇكىمەتى اراسىندا قول جەتكىزىلگەن Brexit شارتتارى تۋرالى كەلىسىمنىڭ جوباسىن ءۇش رەت كەرى قايتارعان. ناتيجەسىندە ەۋروپالىق وداق Brexit-ءتى الدىمەن ءساۋىر نەمەسە مامىرعا، سودان كەيىن 31 قازانعا بەكىتۋگە كەلىستى. بۇل قادام دا ءساتسىز اياقتالىپ، مەملەكەتتىڭ وداقتان شىعاتىن مەرزىمى 31 قاڭتارعا شەگەرىلدى.

"The Qazaq Times"