اشحاباد پوليتسياسى كوشەدە سەرۋەندەگەن قىز بەن جىگىتتى ۇستاي باستادى

تءۇركىمەنستان استاناسىنداعى كءوشەلەردە سەرۋەندەگەن قىز بەن جىگىتتىڭ قۇجاتتارىن تەكسەرىپ، ءۇيلەنبەگەندەرىن پوليتسيا بءولىمىنە الىپ كەتەدى، دەپ حابارلادى اشحابادتاعى ازاتتىق راديوسىنىڭ ءتىلشىسى.

استانالىق جوعارعى وقۋ ورىندارىنىڭ بىرىندە وقيتىن ماقسات ەسىمدى ستۋدەنت ءبىر ايدان بەرى پوليتسيانىڭ سوڭىنان قالماي قويعانىن ايتتى.

"ستۋدەنتتەر ادەتتە وقۋدان نەمەسە كوپشىلىك شارالاردان جاتاقحاناعا بىرگە قايتادى، بىرگە سپەكتاكلگە، كونتسەرتكە بارادى. ساياباقتا بىرگە قىدىرادى", - دەيدى ول.

ستۋدەنتتىڭ ايتۋىنشا، سوڭعى ۋاقىتتا پوليتسيا قىزمەتكەرلەرى كوشەدە كەتىپ بارا جاتقان نەمەسە ساياباقتا بىرگە وتىرعان قىز بەن جىگىتتىڭ قۇجاتتارىن تەكسەرۋىن جيىلەتكەن، ولاردى تەرگەپ، تاعى دا بىرگە ۇستالعان جاعدايدا وقۋدان شىعاراتىنىن ەسكەرتەتىن بولعان.

اشحاباد تۇرعىندارى پوليتسيا قىزمەتكەرلەرىنىڭ بۇل ارەكەتىن تۇسىنبەيتىندىكتەرىن مالىمدەدى. قۇقىققورعاۋ ورگاندارى دا بۇل تاقىرىپقا قاتىستى ازاتتىق راديوسىنا تۇسىنىكتەمە بەرمەدى.

“The Qazaq Times”