م.تۇمەنباي تازابەكوۆ جيىنى جونىندە: "...بيلىك بۇل جەردە دارمەنسىز"

بەلگىلى جازۋشى-جۋرناليست، الەۋمەتتىك جەلى قولدانۋشىسى مۇحتار تۇمەنباي ءوزىنىڭ «Facebook» پاراعىندا "كۇشتىك قۇرىلىمدار مەن قاراپايىم جاستاردىڭ الدىندا ءدىني-ساياسي دارىستەر وقىپ، باسى داۋعا قالعان" ءدىني بەلسەندى، ەكس-ايتىسكەر مۇحامەدجان تازابەكوۆتىڭ الماتىدا وتكەن جيىنىنا قاتىستى جەكە پىكىرىن ءبىلدىردى. 

"ومىرمەن حوش ايتىسام دەپ شەشىم قابىلداعان ادامدى ولىمنەن ەشنارسە توقتاتا المايتىن سەكىلدى، وشەم دەگەن ەل دە ءوزىنىڭ  تۇڭعيىعىنا قاراي باس-كوز جوق جۇگىرەدى ەكەن. مەن سونى ۇقتىم. كىم ساتقىن، قايسىسى بيلىكپەن اۋىز جالاستى، كىم وڭ، كىم سولاقاي دەپ قوعامنىڭ وزىق ويلى ازاماتتارى ءبىر-بىرىنەن كۇماندانىپ جۇرگەندە ۆاححابيزم اعىمىن تاراتۋشى توپتار وزدەرىنىڭ ايار پيعىلىن جۇزەگە اسىرىپ جاتىر.

باستاپقىدا ءوز ادەپتتەرىن حالىقتىق داستۇردەن ادا قىلماقشى بولعان، ۇلتتىق مۋزىكا - حارام، دومبىرا ءۇنى - حارام دەپ ۋاعىز ايتقان ولار، ەل ىشىندە ءداستۇرلى ۇلتتىق قۇندىلىقتار ءالى دە مىقتى ەكەنىن سەزىپ، باسقا تاكتيكاعا كوشتى. ەندى ولار اتا-بابا ءداستۇرىن قولداۋشى كۇش رەتىندە كورسەتپەك وزدەرىن. ۆاححابتاردىڭ رۋپورى، قىزىل ءتىلدى وراتورى مۇحامەدجان تازابەك الماتىنىڭ تورىندە، اناۋ-مىناۋ ەمەس، ەلىمىزدەگى ەڭ ءىرى رەسپۋبليكا سارايىندا، 5000 ادامعا دەيىن جيناي الاتىن زالدا حالىقپەن تەگىن كەزدەسۋ وتكىزىپتى. قايتالاپ ايتام، تەگىن. بۇل عيماراتتى ءبىر كەشكە جالداۋ 10 ميلليوننان كەم تۇرمايدى. ال ونى تولەپ بەرگەن كىم؟ مۇحامەدجاننىڭ ءوزى مە؟ قايدام، ءاربىر كەزدەسۋىنە سونداي اقشا شاشا بەرسە، بايعۇس دامبالسىز قالار. ايتايىن دەگەنىم، مۇنداي الترۋيستتىك شارانى بىرەۋ قارجىلاندىرعانى تۇسىنىكتى. ماسەلە كىم ەكەنىندە. كىم بولسا دا قالتاسى قالىڭ ادامدار. ال مۇنداي شىعىنعا نە سەبەپتەن بارىپ وتىر ول ادامدار؟ دەمەك ءبىر ماقسات بار. ول ماقسات بىرەۋ عانا - حالىق نازارىن وزدەرىنە اۋدارۋ. ال اۋدارىپ بولعان سوڭ، ءوز يدەولوگياسىنا جەتەكتەۋ. يدەولوگيانى جۇرگىزۋ ىلىمىندە ءبىر مىزعىماس قاعيدات بار. ول - بۇقارانى ءوز قالاۋىڭا كوندىرگىڭ كەلسە، وندا الدىمەن سول بۇقارانىڭ قالاۋى مەن تالعامى دەڭگەيىنە دەيىن ءتۇس. سولاردىڭ ماقسات-مۇراتتارىن قايتالاپ وزىنە ايت. ايتا بەر، ايتا بەر. سودان سوڭ عانا، بۇقارا سەنىڭ ولارمەن ءبىر ەكەنىڭدى سەزگەن سوڭ قولىنان ال دا، جەتەكتەگەندەي ەتىپ ءوز جولىڭمەن ەرتىپ الىپ جۇرە بەر. سوندا ولار سەنىڭ جەتەگىڭدە قايدا بولسا دا ەرىپ جۇرە بەرەدى. ءدال قازىر ۆاححابتاردىڭ ۇستانىپ وتىرعان ساياساتى وسى.

قازاقتىڭ اتا داستۇرىنە بەرىك ەكەنىن تۇسىنگەن سوڭ، ولار بۇگىندە قازاقتىڭ مىزعىماس اكسيومالارىن سەندەردىڭ وزدەرىڭە قايتالاي باستادى. وزدەرىڭ لوگيكاعا سالىپ كورىڭدەرشى، جاڭالىق اشتى ما قازاققا؟ جاس ۇلكەندى، ۇل اكەنى، قىز اكە-شەشەنى قۇرمەت تۇتۋ، ايەل-ەردى، ەر-ايەل زاتىن، ونىڭ ىشىندە بالالارىڭنىڭ اناسىن سىيلاۋ قاعيداتتارى سىزدەرگە جاڭالىق پا؟ ايتىڭدارشى، تاڭسىق پا؟ جوق. جاڭالىق ەمەس. سويتە تۇرا، ويباي، ءبىزدىڭ ەلىمىزدى قۇتقارار كۇش جالعىز وسىلار دەگەندەر كۇن اسىپ ءوسىپ بارا جاتىر. كەشەگى كەش سونىڭ كۋاسى. جيىنعا بارىپ، تاڭداي قاعىپ، اۋىزدارىنىڭ سۋى قۇرىپ باق وكىلدەرىنە ينتەرۆيۋ بەرىپ جاتقان ءوزىم تانيتىن زيالى اعالارىمدى كورىپ جاعامدى ۇستادىم. ءبىز ازات قازاق ساناسى ءۇشىن كۇرەستە ۇتىلۋدىڭ ءسال-اق الدىندا تۇرمىز. ال ءبارىڭنىڭ ويلاۋ قابىلەتتەرىڭدى ەسەڭگىرەتكەندە نە بولاتىنىن  ايتايىن با؟  ارينە، الدىمەن بالا اكەنى، جاس ۇلكەندى تىڭداۋى ءتيىس دەگەننەن باستالادى. سودان ءارى جىنىستىق ءبولۋ باستالادى. ايەل ەركەككە باعىنىشتى بولۋ كەرەك دەيدى ولار. ەركەك نە ايتسا سول زاڭ. ودان سوڭ جاماعات باسشىلارىنىڭ ايتقانى زاڭ بولادى سىزدەرگە. ءسويتىپ وزدەرىنە عانا باعىنىشتى يەرارحيا قۇرىلادى. سول كەزدە سەندەرگە كەز كەلگەن اۆتوريتاريزم دەموكراتيانىڭ كوكەسى بولىپ كورىنەدى. سەبەبى ەركىن وي، ازات ءسوز دەگەن ۇعىمدار مۇلدە جويىلادى. تەك يگيلداعىداي سوقىر سەنىمگە باس يەسىڭدەر.

سوسىن ءبارىڭ دە قۇدايدىڭ قۇلىسىڭدار، دەمەك قۇدايدىڭ وسىنداعى ۋاكىلى، ءبىزدىڭ دەگەنىمىزبەن جۇرەۋگە تيىسسىڭدەر دەپ شەشىم شىعارادى. سوندا سەندەر بۇگىنگى كۇنگە زار بولىپ قالاتىن بولاسىڭدار. كەش بولماي تۇرعانداردا ويلانىڭدار، الاشتىڭ ازات ازاماتتارى. نەندەي بۇعاۋعا ءوز ەرىكتەرىڭمەن كەتىپ بارا جاتقاندارىڭدى ءبىر ءسات بولسا دا، ويلانىڭدار. بيلىك بۇل جەردە دارمەنسىز. اركىم ءوز ساناسىنا جۇگىنۋى ءتيىس".

27 قاراشا رەسپۋبليكا سارايىندا وتكەن مۇحامەدجان تازابەكوۆتىڭ ء"تالىم TREND" شىعارماشىلىق كەشىنە قاتىستى مۇحتار تۇمەنبايدىڭ جازباسىن جەلى وقىرماندارى 100 مارتە بولىسكەن.  

"The Qazaq Times"