Mwhtar Tümenbay men Mwhamedjan Tazabekov. Foto: aşıq derekköz

Belgili jazuşı-jurnalist, äleumettik jeli qoldanuşısı Mwhtar Tümenbay öziniñ «Facebook» parağında "küştik qwrılımdar men qarapayım jastardıñ aldında dini-sayasi därister oqıp, bası dauğa qalğan" dini belsendi, eks-aytısker Mwhamedjan Tazabekovtiñ Almatıda ötken jiınına qatıstı jeke pikirin bildirdi. 

"Ömirmen hoş aytısam dep şeşim qabıldağan adamdı ölimnen eşnärse toqtata almaytın sekildi, öşem degen el de öziniñ  twñğiığına qaray bas-köz joq jügiredi eken. Men sonı wqtım. Kim satqın, qaysısı bilikpen auız jalastı, kim oñ, kim solaqay dep qoğamnıñ ozıq oylı azamattarı bir-birinen kümändanıp jürgende vahhabizm ağımın taratuşı toptar özderiniñ ayar piğılın jüzege asırıp jatır.

Bastapqıda öz adeptterin halıqtıq dästürden ada qılmaqşı bolğan, wlttıq muzıka - haram, dombıra üni - haram dep uağız aytqan olar, el işinde dästürli wlttıq qwndılıqtar äli de mıqtı ekenin sezip, basqa taktikağa köşti. Endi olar ata-baba dästürin qoldauşı küş retinde körsetpek özderin. Vahhabtardıñ ruporı, qızıl tildi oratorı Mwhamedjan Tazabek Almatınıñ törinde, anau-mınau emes, elimizdegi eñ iri respublika sarayında, 5000 adamğa deyin jinay alatın zalda halıqpen tegin kezdesu ötkizipti. Qaytalap aytam, TEGİN. Bwl ğimarattı bir keşke jaldau 10 millionnan kem twrmaydı. Al onı tölep bergen kim? Mwhamedjannıñ özi me? Qaydam, ärbir kezdesuine sonday aqşa şaşa berse, bayğws dambalsız qalar. Aytayın degenim, mwnday al'truisttik şaranı bireu qarjılandırğanı tüsinikti. Mäsele kim ekeninde. Kim bolsa da qaltası qalıñ adamdar. Al mwnday şığınğa ne sebepten barıp otır ol adamdar? Demek bir maqsat bar. Ol maqsat bireu ğana - halıq nazarın özderine audaru. Al audarıp bolğan soñ, öz ideologiyasına jetekteu. Ideologiyanı jürgizu iliminde bir mızğımas qağidat bar. Ol - bwqaranı öz qalauıña köndirgiñ kelse, onda aldımen sol bwqaranıñ qalauı men talğamı deñgeyine deyin tüs. Solardıñ maqsat-mwrattarın qaytalap özine ayt. Ayta ber, ayta ber. Sodan soñ ğana, bwqara seniñ olarmen bir ekeniñdi sezgen soñ qolınan al da, jetektegendey etip öz jolıñmen ertip alıp jüre ber. Sonda olar seniñ jetegiñde qayda bolsa da erip jüre beredi. Däl qazir vahhabtardıñ wstanıp otırğan sayasatı osı.

Qazaqtıñ ata dästürine berik ekenin tüsingen soñ, olar büginde qazaqtıñ mızğımas aksiomaların senderdiñ özderiñe qaytalay bastadı. Özderiñ logikağa salıp köriñderşi, jañalıq aştı ma qazaqqa? Jas ülkendi, wl äkeni, qız äke-şeşeni qwrmet twtu, äyel-erdi, er-äyel zatın, onıñ işinde balalarıñnıñ anasın sıylau qağidattarı sizderge jañalıq pa? Aytıñdarşı, tañsıq pa? Joq. Jañalıq emes. Söyte twra, oybay, bizdiñ elimizdi qwtqarar küş jalğız osılar degender kün asıp ösip bara jatır. Keşegi keş sonıñ kuäsi. Jiınğa barıp, tañday qağıp, auızdarınıñ suı qwrıp BAQ ökilderine interv'yu berip jatqan özim tanitın ziyalı ağalarımdı körip jağamdı wstadım. Biz azat qazaq sanası üşin küreste wtıludıñ säl-aq aldında twrmız. Al bäriñniñ oylau qabiletteriñdi eseñgiretkende ne bolatının  aytayın ba?  Ärine, aldımen bala äkeni, jas ülkendi tıñdauı tiis degennen bastaladı. Sodan äri jınıstıq bölu bastaladı. Äyel erkekke bağınıştı bolu kerek deydi olar. Erkek ne aytsa sol zañ. Odan soñ jamağat basşılarınıñ aytqanı zañ boladı sizderge. Söytip özderine ğana bağınıştı ierarhiya qwrıladı. Sol kezde senderge kez kelgen avtoritarizm demokratiyanıñ kökesi bolıp körinedi. Sebebi erkin oy, azat söz degen wğımdar mülde joyıladı. Tek IGILdağıday soqır senimge bas iesiñder.

Sosın bäriñ de qwdaydıñ QWLISIÑDAR, demek qwdaydıñ osındağı uäkili, bizdiñ degenimizben jüreuge tiissiñder dep şeşim şığaradı. Sonda sender bügingi künge zar bolıp qalatın bolasıñdar. Keş bolmay twrğandarda oylanıñdar, alaştıñ azat azamattarı. Nendey bwğauğa öz erikteriñmen ketip bara jatqandarıñdı bir sät bolsa da, oylanıñdar. Bilik bwl jerde därmensiz. Ärkim öz sanasına jüginui tiis".

27 qaraşa Respublika sarayında ötken Mwhamedjan Tazabekovtiñ "Tälim TREND" şığarmaşılıq keşine qatıstı Mwhtar Tümenbaydıñ jazbasın jeli oqırmandarı 100 märte bölisken.  

"The Qazaq Times"