تۇركيا رەسەيلىك س-400 زەنيتتىك ىمىراندارىن سىناقتان وتكىزبەك

تۇركيا قارۋلى كۇشتەرى رەسەيلىك س-400 زەنيتتىك زىمىران جۇيەلەرىنىڭ راديولوكاتسيالىق جۇيەلەرىن سىناۋدى باستاماق. بۇل تۋرالى CNN Turk تەلەارناسى حابارلادى.

تەلەارنا مالىمەتتەرى بويىنشا، تەست سىناقتارى اپتانىڭ ءبىرىنشى كۇنى باستالادى جانە انكاراعا جاقىن جەردە وتكىزىلەدى. ول ءۇشىن اۋاعا ءار ءتۇرلى اۋە كەمەلەرى، سونىڭ ىشىندە F-16 جويعىشتار كوتەرىلەدى. تۇرىك ماماندارى زرس مەن ۇشاقتاردىڭ اراسىندا بايلانىس ورناتۋىن تەكسەرمەك. ارنايى سىناق ءۇشىن ميۋرتەد اۆيابازاسى ىسكە قوسىلعان.

2017 جىلدىڭ قىركۇيەگىندە رەسەي تۇركيامەن قۇنى $2,5 ملرد بولاتىن س-400 زەنيتتىك زىمىران جۇيەلەرىنە بايلانىستى كەلىسىمشارتقا قول قويدى. جوسپار بويىنشا زىمىرانداردىڭ ءبىرىنشى بولىگى شىلدەدە جەتكىزىلدى.

اقش پەن ناتو تۇركيانىڭ رەسەيلىك زىمىرانداردى ساتىپ الۋىنا تۇبەگەيلى قارسى. ۋاشينگتون «رەسەي قارۋىن تۇركيا اۋماعىنا ورنالاستىرۋ ناتو ستاندارتتارىنا قايشى كەلەدى» دەپ ەسەپتەيدى. مۇنىڭ الدىندا ەردوعان ءوز شەشىمىنەن باس تارتپايتىنىن مالىمدەگەن.
13 قاراشادا دونالد ترامپ پەن رەجەپ تايىپ ەردوعان ۋاشينگتوندا رەسمي كەزدەسۋ ۇيىمداستىردى. ترامپ اكىمشىلىگى ەردوعانعا رەسەيلىك س-400 زىمىراندارىن پايدالانباۋدى تالاپ ەتىپ، ونىڭ ورنىنا امەريكالىق F-35 بايلانىس جانە قورعاۋ قۇرالدارىن ۇسىنعان. ەگەر انكارا ۋاشينگتوننىڭ ۇسىنىسىنا كەلىسسە، F-35 كوپ ماقساتتى جويعىشتاردى قۇرۋ باعدارلاماسىنا قايتا ورالىپ، رەستريكتسيادان قۇتىلا الادى.

"The Qazaq Times"