سوچيدەگى كەزدەسۋ كەشە 29 قىركۇيەك كەشكە قاراي اياقتالدى. فوتو: انادولى اقپاراتتىق اگەنتتىگى

سوچي قالاسىندا رەسەي پرەزيدەنتى ۆلاديمير پۋتين تۇركيا پرەزيدەنتى رەجەپ تايىپ ەردوعانمەن كەزدەستى. تاراپتار رەسەي-تۇركيا اراسىنداعى جانە ايماقتىق بىرقاتار تاقىرىپتاردى تالقىلادى. بۇدان بۇرىن تۇركيانىڭ رەسمي باسىلىمدارى پرەزيدەنت ەردوعاننىڭ كەزەكتى رەسەي ساپارىنىڭ ماڭىزى زور دەپ كورسەتكەن بولاتىن.

تۇرىك اقپارات قۇرالدارى سوچي ءسامميتىنىڭ باستى تاقىرىبى ءسۇريا ماسەلەسى دەپ كورسەتتى، ەردوعان كەزدەسۋدە ەڭ الدىمەن ءسۇريا جەرىندەگى كۇرت كۇشتەرىنىڭ ماسەلەسىن كوتەرگەن. ماسكەۋ سۇرياداعى ىقپالدى ويىنشى سانالادى، سوڭعى ۋاقىتتاردا رەسەي قارۋلى كۇشتەرى باقىلاۋدا ۇستاپ تۇرعان جەرلەردە PKK كۇشتەرىنىڭ تۇركياعا باعىتتالعان قارۋلى ارەكەتتەرى كوبەيگەن، بۇل انكارانىڭ مازاسىن قاشىرۋدا. كەزدەسۋدە ەردوعان شابۋىلداردىڭ الدىن الۋىن تالاپ ەتكەن.

تۇرىك جانە ورىس ليدەرلەرى ءسۇريا، اۋعانستان جانە ليبيا تاقىرىپتارىن تالقىلاپ، ولاردان كەلەتىن بوسقىندار تولقىنىنا قارسى شارالار تۋرالى دا كەڭەسكەن. ەكى ەل پرەزيدەنتتەرىمەن قاتار بارلاۋ ۇيىمدارىنىڭ جەتەكشىلەرى دە كەزدەسۋدە بولعان. بۇل اۋعانستان مەن ءسۇريا بويىنشا ماسكەۋ مەن انكارا بىرقاتار جاڭا مالىمەتتەردى الماسقان بولۋى مۇمكىن دەگەندى بىلدىرەدى.

ورىس اقپارات قۇرالدارىنىڭ حابارىنا قاراعاندا پۋتين مەن ەردوعان ورتاسىنداعى كەزدەسۋ ءۇش ساعاتقا جۋىق جالعاسقان. 2 ساعات 45 مينۋتتىق كەزدەسۋدىڭ سوڭىنا قاراي تاراپتار انكارا مەن ماسكەۋ اراسىنداعى قارىم-قاتىناستى جاقسارتا ءتۇسۋدى دە كوبىرەك ءسوز ەتىپتى. بۇل بويىنشا ليدەردەر ورىس-تۇرىك اراسىندا كۇن سايىن ارتىپ كەلە جاتقان ساۋدا-ساتتىق جانە قورعانىس ونەركاسىبى بويىنشا ىنتىماقتاستىق كولەمىن مىسال ەتكەن.

كەزدەسۋدە ايتىلعاندا تۇركيا رەسەيگە 1,5 ملرد اقش دوللارى كولەمىندە ينۆەستيتسيا سالعان بولسا، ورىستىڭ تۇرىك جەرىندەگى ينۆەستيتسياسى 6,5 ملرد دوللاردى قۇرايدى. سوچي كەزدەسۋىندە سونداي-اق تۇركيانىڭ رەسەيدەن ساتىپ العان S-400 زىمىران قورعانىس جۇيەسى مەن قاراباق كەلىسىمى دە قايتا پىسىقتالعان.

The Qazaq Times