ەرجانات بايقاباي ۇلىنىڭ شىعارماشىلىق كەشىندە جىر جيناعىنىڭ تۇساۋى كەسىلدى. فوتو: The Qazaq Times

25 ناۋرىز كۇنى، الماتى قالاسىندا قىتايداعى ەكى ميلليونعا جۋىق قازاقتىڭ ەركە اقىنى ەرجانات بايقاباي اتا جۇرتىنا الا كەلگەن شاشۋى رەتىندە «جۇرەككە تۇسكەن جول» اتتى شىعارماشىلىق كەشىن بەردى.

جامبىل اتىنداعى مەملەكەتتىك فيلارمونياسىندا بولىپ وتكەن شىعارماشىلىق كەشكە تانىمال ونەر جۇلدىزدارى قاتىستى. كەشتى اقىن باقىت بەدەلحان جۇرگىزىپ، قاجىمۇرات شەشەنقۇل، نۇرلان مەن شابا، اققۋ مەن گۇلناز، زيات پەن بيبىگۇل، جانات نۇرسۇلتان سىندى ونەرپاز انشىلەر اقىننىڭ سوزىنە جازىلعان ءبىر قاتار اندەر ورىندادى. سونىمەن بىرگە ت.جۇرگەنوۆ اتىنداعى ونەر اكادەمياسىنىڭ ستۋدەنتتەرى كەش يەسىنىڭ ولەڭدەرىن اسەرلى كومپوزيتسيامەن ارلەدى. كەش يەسى ءوزىنىڭ تولعاۋلارى مەن ولەڭدەرىنەن كورەرمەنىنە شاشۋ شاشتى.

اقىن جاركەن بودەشۇلى كىتاپتىڭ تۇساۋىن كەسىپ، اۆتورعا اق تىلەگىن اقتاردى. فوتو: The Qazaq Times

 

ولەڭ مەن ونەردەگى ۇستازدارى قايرات قۇل-مۇحاممەد جانە ابدىعاني ءبازىلحانۇلى اعالارى دا كىتاپتىڭ تۇساۋىن كەسىپ، سىي-قۇرمەتىن كورسەتتى.

ابدىعني ءبازىلجانۇلى تالعار اۋدانى اتىنان ارنايى العىسحات ۇسىندى.

كەشتە ەرجانات بايقابايدىڭ «جۇرەككە تۇسكەن جول» اتتى جىر جيناعىنىڭ تۇساۋى كەسىلدى. قازاق پوەزياسىنىڭ اسقاق تۇلعالارىنىڭ ءبىرى جاركەن بودەشۇلى مەن ەرجاناتتىڭ ولەڭ مەن ونەردەگى ۇستازدارى اقىن قايرات قۇل-مۇحاممەد مەن ابدىعاني ءبازىلحانۇلى جانە قازاقستان جازۋشىلار وداعى توراعاسىنىڭ ورىنباسارى جاناربەك ءاشىمجان كىتاپتىڭ تۇساۋىن كەستى.  اقىن جاركەن بودەش ەرجاناتقا اق باتاسىن بەرسە، ۇستازى قايرات قۇل-مۇحاممەد شاكىرت ىنىسىنە تۇلپار مىنگىزدى. ابدىعاني ءبازىلحانۇلى تالعار اۋدانىنىڭ اكىمدىگى اتىنان ارنايى العىس حات تاپسىردى. جازۋشىلار وداعى اتىنان جاناربەك ءاشىمجان العىس حات تاپسىرىپ، القاۋ ءسوزىن سويلەدى. دۇنيەجۇزى قازاقتارى قاۋمداستىعى اتىنان وسى ۇيىمنىڭ جاستار ورتالىعىنىڭ جەتەكشىسى تالاپبەك تىنىسبەكۇلى قۇتتىقتاۋ حاتىن تاپسىردى.  اق شىلاۋىشتى اجەلەر تۇساۋى كەسىلگەن كىتاپقا جانە كورەرمەنگە، قازاق داستۇرىمەن اق شاشۋ شاشتى.

"ەر جانىبەك" حالىقارالىق قوعامدىق قورىنىڭ پرەزيدەنتى ج.تۇركيا ەرجانات باۋىرىنا ات مىنگىزىپ شاپان جاپتى. فوتو: The Qazaq Ti,mes

كەش يەسىمەن ايتىسكەر شۇعايىپ سەزىمحان كورەرمەنگە ءبىر مايدان قىزىقتى ايتىس تارتۋ ەتتى. كەش سوڭىندا ەرجانات ءوزىنىڭ اۆتورلى انىمەن ساحنا شىمىلدىعىن جاپتى. القالاعان الەۋمەت ەرجاناتپەن قۇشاقتاسا قول الىسىپ، ەستەلىك سۋرەتكە ءتۇسىپ، قيماي قوشتاستى. التاۋدىڭ باۋىرىندا التايدىڭ اساۋ اقىنى ەرجانات بايقابايدىڭ شىعارماشىلىق كەشىندە زال تولى ادام اقىنىنا رازى بولىپ تاراستى.

“The Qazaq Times”