گونكونگتاعى بيلىك پەن ازاماتتار اراسىندا جارتى جىلدان بەرى ءوتىپ جاتقان نارازىلىقتىڭ قاقتىعىسقا ۇلاسۋىنان سەسكەنگەن قر ءسىم 118 ستۋدەنتتى ەلگە الىپ كەلدى.
گونكونگتاعى جارتى جىلعا سوزىلعان نارازىلىقتىڭ توتەنشە جاعدايعا ۇلاسۋىنان كەيىن ونداعى قازاقستاندىق ستۋدەنتتەر ەلگە ورالىپ جاتىر. سىرتقى ىستەر مينيسترلىگىنىڭ حابارلاۋىنشا، قازىر قازاقستاندىق 118 ستۋدەنت ەلگە جەتكىزىلگەن. تاعى ەلۋگە جۋىق ستۋدەنت جۋىردا قازاقستانعا قايتپاق.
سىرتقى ىستەر مينيسترلىگىنىڭ ءباسپاسوز قىزمەتىنىڭ جەتەكشىسى ايبەك سمادياروۆتىڭ ايتۋىنشا، گونكونگتان قازاقستانعا ورالعان ستۋدەنتتەر 2020 جىلدىڭ قاڭتارىنا دەيىن وقۋىن توقتاتقان، ءتىپتى كەيبىرى قاشىقتىقتان وقۋ فورماسىنا كوشكەن. قازاقستاندىق ستۋدەنتتەردى ەلگە قايتارۋ، ولاردى اەروپورتقا جەتكىزۋ شارالارىمەن قازاقستاننىڭ گونكونگتاعى ەلشىلىگى مەن قازاقستاندىق ستۋدەنتتەر قاۋىمداستىعى اينالىسقان.
«وسىعان بايلانىستى قر سىرتقى ىستەر مينيسترلىگى گونكونگتە وقىپ جاتقان بارلىق ستۋدەنتتەرگە قازاقستانعا ورالۋدى ۇسىنادى. سونىمەن قاتار، قر ازاماتتارىن قاۋىپسىزدىك جاعدايى تۇراقتانعانشا گونكونگقا اسا قاجەتى بولماسا، بارماي-اق قويۋعا شاقىرادى»، – دەدى ۆەدومستۆونىڭ رەسمي وكىلى.
جارتى جىلعا تاياۋ ۋاقىت جاپپاي نارازىلىق شەرۋلەرى ءجۇرىپ جاتقان گونكونگ قالاسىندا پوليتسيا بۇگىندە ءتورت مىڭعا تارتا ادامدى ۇستاعان. ميتينگ كەزىندە ءبىر جارىم مىڭ ادام جاراقات الىپ، 400-دەن استام پوليتسيا قىزمەتكەرى زارداپ شەككەن. شەرۋشىلەر بەيجىڭنىڭ گونكونگتىڭ دەربەس ىشكى ىسىنە ارالاسۋىنا نارازى، ولار بيلىكتەن ناقتى قادامدار تالاپ ەتىپ كەلەدى. سوڭعى كەزدەرى قارسىلىق اكتسيالارى قاقتىعىسقا ۇلاسىپ، ستيحيالى سيپاتقا ەنىپ كەلەدى.
– گونكونگتا بولۋعا ءماجبۇر ادامداردان بارلىق قاجەتتى ساقتىق شارالارىن قابىلداۋلارىن سۇرايمىز. اقپاراتتى باق-تا جانە گونكونگتاعى قازاقستاننىڭ باس كونسۋلدىعىنىڭ رەسمي سايتىنان كورۋگە بولادى. ازاماتتارىمىزدىڭ قاۋىپسىزدىگىن قامتاماسىز ەتۋ جانە ەلگە ۋاقىتىلى ورالۋى ماقساتىندا Air Astana كومپانياسىمەن ەرتە ساتىپ الىنعان بيلەتتەرگە ۇشۋ كۇنىن ايىپپۇل مەن باعا ايىرماسىن تولەمەي-اق وزگەرتۋ مۇمكىندىگى تۋرالى كەلىسىمگە قول جەتكىزىلدى. ويتكەنى، ستۋدەنتتەردىڭ كوبى جەلتوقساننىڭ سوڭىنا، دەمالىس باستالار ۋاقىتقا بيلەت الىپ قويعان. قازاقستاننىڭ باس كونسۋلدىعى گونكونگتاعى قازاقستاندىق ستۋدەنتتەر قاۋىمداستىعىمەن بىرلەسىپ ستۋدەنتتەردى اۋەجايعا دەيىن جيناۋ جانە تاسىمالداۋدى ۇيىمداستىردى، – دەپ حابارلادى رەسمي وكىل.
ءدال وسى سەبەپپەن وتكەن اپتا بىشكەك 42 قىرعىز ستۋدەنتىن كەرى قايتارعان ەدى.
گونكونگتاعى قىتاي ۋنيۆەرسيتەتىنىڭ الدىندا نارازىلار "دەموكراتيا ءۇشىن" كىرپىشتەن قابىرعا تۇرعىزىپ جاتىر. فوتو: ەنتوني كۆان
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟