قازاقستانداعى مىڭداعان ءسابي ءولىمىنىڭ سەبەبى نەدە؟    

بيىلعى قاڭتار-تامىز ايلارىندا قازاقستاندا 2239 ءسابي قايتىس بولعان.

2019 جىلعى قاڭتار-تامىز ايلارىندا جاسىنا تولىپ ۇلگەرمەگەن 2239 ءسابي (2018 جىلعى قاڭتار-تامىز – 2117) ءولىمى تىركەلگەن. 2018 جىلدىڭ سايكەس كەزەڭىمەن سالىستىرعاندا ءبىر جاسقا دەيىنگى قايتىس بولعان بالالار سانى بيىل 5,8%-عا ءوستى. قازاقستان رەسپۋبليكاسى ۇلتتىق ەكونوميكا مينيسترلىگى ستاتيستيكا كوميتەتىنىڭ سايتىندا جاريالانعان «قازاقستان رەسپۋبليكاسىنىڭ الەۋمەتتىك-ەكونوميكالىق دامۋى» جيناعىندا كورسەتىلگەن دەرەكتەر بويىنشا، قاڭتار-تامىز ارالىعىندا تۋعان ءار مىڭ بالاعا شاققاندا 8,44 (8,09 – 2018 ج.) ءولىم-ءجىتىم جاعدايى كورىنىس تاپقان.

نارەستە ءولىمىنىڭ نەگىزگى سەبەبى – بۇل پەريناتالدى كەزەڭدە پايدا بولاتىن جاعدايلار. ءدال وسى سەبەپپەن بيىلعى قاڭتار-تامىز ارالىعىندا 1140 (1078) نارەستە قايتىس بولدى ءارى  بۇل سابيلەر ءولىمىنىڭ 50,9%-ىن (50,9% – 2018 ج.) قۇرادى. تۋا بىتكەن اۋىتقۋلاردان قايتىس بولعان سابيلەردىڭ سانى 460 (418 – 2018 ج.) نەمەسە 20,5% (19,7% – 2018 ج.), تىنىس الۋ ورگاندارىنىڭ اۋرۋلارىنان – 172 (140 – 2018 ج.) نەمەسە 7,7% (6,6% – 2018 ج.) جانە جازاتايىم وقيعالاردان، ۋلانۋدان جانە جاراقاتتانۋدان – 83 (95 – 2018 ج.) نەمەسە 3,7% (4,5% – 2018 ج.).

سونداي-اق كورسەتىلگەن كەزەڭدە رەسپۋبليكادا 88014 ادام قايتىس بولعان دەسەدى. بۇعان دەيىن، وتكەن ايدىڭ سوڭىندا دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتىنىڭ باسشىسى ليۋدميلا بيۋرابەكوۆا قازاقستان دارىگەرلەرى ءتىرى تۋعان 277 نارەستەنىڭ ءولىمىن جاسىرعانىن مالىمدەگەن بولاتىن. ونىڭ سوزىنشە، اۋديت قورىتىندىسى بويىنشا 2018 جىلى قازاقستاندا 277 بالا ءتىرى تۋعان، بىراق، ونى دارىگەرلەر ءولى تۋدى دەپ جازعانى انىقتالعان.

"The Qazaq Times"