باليەۆا: قازاقستاندا سوعىس جوق، بىراق بالالار ءولىپ جاتىر

ءماجىلىس وتىرىسىندا بالا قۇقىقتارى جونىندەگى ۋاكىل زاعيپا باليەۆا ەلىمىزدە بالالار ءولىمى سيرەمەي تۇرعانىنا الاڭداۋشىلىق ءبىلدىردى. ونىڭ سوزىنشە، جىل باسىنان بەرى قازاقستاندا 26 بالا قاساقانا ولتىرىلگەن. تاعى 136 جەتكىنشەك ءوز-وزىنە قول سالىپتى.

زاعيپا باليەۆا ءولىم-ءجىتىم سانى وتكەن جىلدارمەن سالىستىرعاندا بىرتە ازايىپ جاتقانىمەن، ءار بالانىڭ ءومىرى قازاق قوعامى ءۇشىن باعالى ەكەنىن ايتتى. سوندىقتان اتا-انالاردى ءوز بالالارىنىڭ قاۋىپسىزدىگىنە اسا ساقتىقپەن قاراۋىن ءوتىندى. بۇلدىرشىندەردىڭ دەنى ەرەكشە قورعالۋى ءتيىس اۋماقتاردا جازىم بولادى. ماسەلەن، اۋلالاردا، مەكتەپتەر مەن اۋرۋحانالاردا. مۇنداي ورىنداردا ەرەسەكتەر قاتار جۇرگەنىمەن، كوبىنە بالا ومىرىنە اراشا تۇسە الماي قالىپ جاتادى ەكەن.

زاعيپا باليەۆانىڭ ايتۋىنشا، ەلىمىزدە 2008 جىلى 10 129 بالا ءولىمى تىركەلگەن ەكەن. ال بىلتىر 5 355 جەتكىنشەك قازا تاپقان.

 “The Qazaq Times”