قىتاي ۇكىمەتى وبا ىندەتى تۋرالى جاسىرىپ وتىر ما؟

سەيسەنبى كۇنى قىتايداعى ىشكى موڭعول اۆتونوميالى رەگيونىنا قاراستى شيليڭعول ايماعىندا جۇقپالى اۋرۋمەن اۋىرعان ەكى ادامعا بەيجىڭنىڭ ساراپشى ماماندارى «وبا دەرتىن جۇقتىرعان» دەگەن دياگنوز قويعان. قىتايدىڭ رەسميلەرى جۇقپالى اۋرۋ قاۋىپتى ىندەت كۇيىندە ەمەس ەكەنىن ايتقانىمەن، قىتايلىق قوعامدا جۇقپالى ىندەتتىڭ ۇرەيى تاراپ كەتتى.

قىتايدا جۇقپالى اۋرۋلاردى باقىلاۋ جانە الدىن-الۋ ورتالىعى سارسەنبىدە بەيجىڭدەگى بارلىق مەديتسينالىق جانە دەنساۋلىق ساقتاۋ بولىمدەرى ءارتۇرلى الدىن-الۋ جانە باقىلاۋ جۇمىستارىن قولعا الىنعانىن ايتتى. بەيجىڭنىڭ چاويان اۋدانىنىڭ حالىق ۇكىمەتى دە حابارلامادا ءتيىستى الدىن-الۋ جانە باقىلاۋ شارالارى جۇزەگە اسىرىلعانىن مالىمدەدى. دەنساۋلىق ساقتاۋ جانە دەنساۋلىق ساقتاۋ جونىندەگى ۇلتتىق كوميسسيا، سونىمەن قاتار، ارنايى جاساقتالعان ساراپشىلار توبى ىشكى موڭعولياعا بارىپ، ينفەكتسيا كوزى مەن تارالۋ جولىن انىقتاۋعا كىرىسكەن.

بىراق، The New York Times باسىلىمى كەشە كەيبىر قىتايلىق اقپارات كوزدەرى ۇسىنعان مالىمەتتەرگە سىلتەمە جاساي وتىرىپ، قىتاي ۇكىمەتىنىڭ قاۋىپتى ىندەت جونىندەگى مالىمەتتى ماقساتتى تۇردە جاسىرىپ قالۋى مۇمكىن ەكەنىن جازعان. بۇنداي تاجريبەلەر قىتايلىق بيلىك تاريحىندا كوپتەپ كەزدەسەتىنىن العا تارتقان. اتالعان باسىلىم قىتاي ۇكىمەتى تسەنزۋراسىمەن ەلدەگى كەڭ اۋديتورياعا يە اقپارات قۇرالدارىندا وباعا قاتىستى مالىمەت تاراتۋدى، تالقىلاۋدى شەكتەپ وتىرعانىن جازعان.

وبا – بۇل ادامزات تاريحىندا اسا اۋىر زوبالاڭ اكەلگەن قاۋىپتى ىندەتتەردىڭ ءبىرى. جۇقپالى اۋرۋ اۋامەن تاراپ، قىسقا عانا ۋاقىتتا مىڭداعان، ءجۇز مىڭداعان ادامنىڭ جانىن جالمايدى. «قارا ءولىم» دەگەن اتپەن تاريحتا قالعان وبا ىندەتى XVI عاسىردا ەۋروپادا تاراپ، ميلليونداعان ادام قىرىلعان. قازاق دالاسىندا دا بۇل اۋرۋ تۋرالى ءتۇرلى دەرەكتەر قالعان. ال، قىتايدىڭ شانشي جانە دوڭ-بەي دەپ اتالاتىن سولتۇستىك-شىعىس ايماقتارىندا تاريحتا اۋىر وبا ىندەتى تاراعانى ءمالىم.

“The Qazaq Times”