تۇركيا-گەرمانيا-فرانتسيا-ۇلىبريتانيا تورتتىگى قاتىساتىن ءسۇريا ماسەلەسى بويىنشا سامميت 3-4 جەلتوقساندا لوندوندا وتكىزىلمەك. بۇل تۋرالى تۇركيا پرەزيدەنتىنىڭ رەسمي وكىلى يبراحيم كالىننىڭ مالىمدەمەسىنە سىلتەمە بەرگەن CNN Turk حابارلادى.

قازاننىڭ ورتاسىندا فرانتسيا پرەزيدەنتى ەممانۋەل ماكرون گەرمانيا، ۇلىبريتانيا باسشىلارىنا ءسۇريا داعدارىسى جانە ناتو-عا مۇشە تۇركيانىڭ اسكەري وپەراتسياسىن تالققىلاۋ تۋرالى ۇسىنىس بىلدىرگەن.

9 قازاندا تۇركيا قاۋىپسىزدىك ايماعىن قۇرۋ ماقساتىندا ءسۇريانىڭ سولتۇستىگىندە «بەيبىتشىلىك قاينارى» وپەراتسياسىن باستاعان. رەسمي انكارانىڭ جوسپارىنا سايكەس سۇريالىق بوسقىندار وسى ايماقتان تۇركياعا ورالا الادى. دەگەنمەن، داماسك بۇل وپەراتسيانى «اگرەسسيالىق ءىس-قيمىل» دەپ اتاسا، حالىقارالىق قاۋىمداستىق انكارانىڭ ارەكەتىن ايىپتادى.

22 قازاندا رەسەي مەن تۇركيا پرەزيدەنتتەرى ۆلاديمير پۋتين مەن رەجەپ تايىپ ەردوعان سوچيدە وتكەن كەزدەسۋدە ءسۇريانىڭ سولتۇستىك-شىعىسىنداعى جاعدايدى رەتتەۋ بويىنشا بىرلەسكەن ءىس-قيمىل تۋرالى مەموراندۋم قابىلدادى. ال 29 قازاندا رەسەي قورعانىس ءمينيسترى سەرگەي شويگۋ كۇردتەر وزدەرىنىڭ قارۋلى قۇرىلىمدارىن قاۋىپسىزدىك ايماعىنان شىعارۋدى اياقتادى دەپ مالىمدەدى. 1 قاراشادا رەسەي مەن تۇركيا اسكەري كۇشتەرى ەۆفرات وزەنىنىڭ شىعىسىندا العاشقى بىرلەسكەن تەكسەرىس جۇرگىزدى.

تۇركيا اسكەري وپەراتسيا باستاعان سوڭ، اقش بىرقاتار تۇرىك كومپانيالارىنا سانكتسيا ەنگىزگەن. كەيىننەن تاراپتار ءوزارا كەلىسىمگە كەلىپ، ۋاشينگتون سانكتسيانى توقتاتتى.

ايتا كەتەر ءبىر جايت، 13 قاراشادا وسى ماسەلەگە قاتىستى رەجەپ تايىپ ەردوعان امەريكالىق ارىپتەسى دونالد ترامپپەن ۋاشينگتوندا رەسمي كەزدەسۋ وتكىزۋى كەرەك. ترامپ ءوزىنىڭ Twitter پاراقشاسىندا ەردوعانمەن كەزدەسۋدى «اسىعا كۇتەتىنىن» جازدى.

"The Qazaq Times"