Түркия-Германия-Франция-Ұлыбритания төрттігі қатысатын Сүрия мәселесі бойынша саммит 3-4 желтоқсанда Лондонда өткізілмек. Бұл туралы Түркия президентінің ресми өкілі Ибрахим Калынның мәлімдемесіне сілтеме берген CNN Turk хабарлады.

Қазанның ортасында Франция президенті Эммануэль Макрон Германия, Ұлыбритания басшыларына Сүрия дағдарысы және НАТО-ға мүше Түркияның әскери операциясын талққылау туралы ұсыныс білдірген.

9 қазанда Түркия қауіпсіздік аймағын құру мақсатында Сүрияның солтүстігінде «Бейбітшілік қайнары» операциясын бастаған. Ресми Анкараның жоспарына сәйкес сүриялық босқындар осы аймақтан Түркияға орала алады. Дегенмен, Дамаск бұл операцияны «агрессиялық іс-қимыл» деп атаса, халықаралық қауымдастық Анкараның әрекетін айыптады.

22 қазанда Ресей мен Түркия президенттері Владимир Путин мен Режеп Тайып Ердоған Сочиде өткен кездесуде Сүрияның солтүстік-шығысындағы жағдайды реттеу бойынша бірлескен іс-қимыл туралы меморандум қабылдады. Ал 29 қазанда Ресей қорғаныс министрі Сергей Шойгу күрдтер өздерінің қарулы құрылымдарын қауіпсіздік аймағынан шығаруды аяқтады деп мәлімдеді. 1 қарашада Ресей мен Түркия әскери күштері Евфрат өзенінің шығысында алғашқы бірлескен тексеріс жүргізді.

Түркия әскери операция бастаған соң, АҚШ бірқатар түрік компанияларына санкция енгізген. Кейіннен тараптар өзара келісімге келіп, Уашингтон санкцияны тоқтатты.

Айта кетер бір жайт, 13 қарашада осы мәселеге қатысты Режеп Тайып Ердоған америкалық әріптесі Дональд Трамппен Уашингтонда ресми кездесу өткізуі керек. Трамп өзінің Twitter парақшасында Ердоғанмен кездесуді «асыға күтетінін» жазды.

"The Qazaq Times"