فرانتسيادا ەكس-ساياساتكەر مەشىت الدىندا وق جاۋدىردى

فرانتسيادا ادامدارعا وق جاۋدىرىپ، جەرگىلىكتى مەشىتتى ورتەمەك بولدى دەگەن كۇدىكپەن 84 جاستاعى ەر ادام ۇستالدى. The Guardian باسىلىمىنىڭ حابارلاۋىنشا، كۇدىكتى بۇرىن فرانتسيادا ساياساتكەر بولعان.

مالىمەتتەر بويىنشا، كۇدىكتى الدىمەن مەشىتكە وت قويماق بولعان. كەيىننەن ادامدارعا قاراي وق جاۋدىرا باستاعان. ارتىنشى كولىگىن ورتەپ، ءىزىن سۋىتقان. بايوننا قالاسىندا بولعان اتىس سالدارىنان 74 جانە 78 جاستاعى ەكى ەر ادام اۋىر جاراقاتتاندى.

Reuters اگەنتتىگىنىڭ اقپاراتىنا سايكەس، كۇدىكتى 2015 جىلى لانداداعى جەرگىلىكتى سايلاۋدا مارين لە پەننىڭ اسىرە وڭشىل «ۇلتتىق مايدان» (قازىرگى ۇلتتىق بىرلەستىك) پارتياسىنا كانديدات بولعان. ءارى سايلاۋدىڭ العاشقى تۋرىندا 18% داۋىس جيناعان. ۇلتتىق بىرلەستىك وكىلدەرى دە مۇنى راستاپ وتىر. بىراق پارتيانىڭ يدەياسىن ۇناتپاعاندىقتان، پارتيادان كەتىپ قالعان. يسلاموفوبيا جونىندە پىكىر بىلدىرگەن فرانتسيا پرەزيدەنتى ەممانۋەل ماكرون مەشىتكە جاسالعان شابۋىلدى قاتاڭ ايىپتاپ، «مۇسىلمان ازاماتتاردى قورعايتىنىن» ايتتى.

بيىل ناۋرىزدا جاڭا زەلاندياداعى كرايستچەرچ قالاسىندا ەكى مەشىتكە جاسالعان تەررورلىق شابۋىلدان 50 ادام قازا تاۋىپ، 34 ادام جاراقات العان ەدى. قارۋلى كۇدىكتى ەڭ الدىمەن «ءال-نۇر» مەشىتىنە باسىپ كىرىپ، جۇما نامازىندا تۇرعان 300-گە جۋىق ادامعا وق جاۋدىرعان بولاتىن.

"The Qazaq Times"