فوتو: https://i.kapital.kz

بەلارۋس پرەزيدەنتى الەكساندر لۋكاشەنكو مەن قازاقستان پرەزيدەنتى قاسىم-جومارت توقاەۆ رەسمي كەزدەسۋ وتكىزدى.

ەكى ەل باسشىلارى كەڭەيتىلگەن قۇرامدا كەلىسسوزدەر جۇرگىزدى. الەكساندر لۋكاشەنكونىڭ ەلىمىزگە رەسمي ساپارى قازاقستان مەن بەلارۋس اراسىنداعى ءوزارا ستراتەگيالىق ارىپتەستىك پەن ەكونوميكالىق ءىس-قيمىلداردىڭ دامۋىنا سەرپىن بەرەتىنىن اتاپ وتكەن قاسىم-جومارت توقاەۆ سوزىندە: «الەكساندر گريگورەۆيچ، ءسىزدىڭ ساپارىڭىز ءبىز ءۇشىن اسا ماڭىزدى. ويتكەنى بۇل ءبىزدىڭ مەملەكەتتەرىمىز اراسىنداعى ىنتىماقتاستىق پەن قارىم-قاتىناستاردىڭ شىنايى دوستىق سيپاتقا قۇرىلعانىن دالەلدەيدى. سونىمەن قاتار ەكى ەلدىڭ ىسكەرلىك ارىپتەستىگىنە، ونىڭ ىشىندە ەكونوميكالىق، گۋمانيتارلىق بايلانىستار مەن حالىقارالىق قارىم-قاتىناستارعا تىڭ سەرپىن بەرەدى»، – دەدى.

ءوز كەزەگىندە الەكساندر لۋكاشەنكو: «قازاقستانمەن اراداعى قارىم-قاتىناسىمىز وتە جاقسى ەكەنىن، ەكونوميكامىزدىڭ ءبىرىن-ءبىرى تولىقتىرىپ وتىراتىنىن جانە ەكى ەل ءوزارا جاڭا مۇمكىندىكتەرگە جول اشاتىنىن ايتقىم كەلەدى. ءبىزدىڭ ەلىمىزدە شىعارىلاتىن ونىمدەر قازاقستانعا قاجەت. ال ءبىز قازاقستاندىق ونىمدەردى ساتىپ الۋعا دايىنبىز»، – دەپ مالىمدەدى.

كەلىسسوزدەر ناتيجەسىندە بىرقاتار قۇجاتتارعا قول قويىلىپ، ارنايۆى شارالار وتكىزىلگەن. اتاپ ايتار بولساق، قازاقستان-بەلارۋس بيزنەس فورۋمىندا تاراپتار جالپى سوماسى 75 ميلليون اقش دوللارى بولاتىن 15 قۇجاتقا قول قوياتىندىعى ءمالىم بولدى. قوس مەملەكەت اۋىلشارۋاشىلىق تەحنيكاسىن جاساۋ، جەڭىل ونەركاسىپ، تاماق ونەركاسىبى، فارماتسەۆتيكا سالالارىندا ارىپتەستىك ورناتپاق.

بىلتىر بەلارۋس رەسپۋبليكاسىنىڭ شارۋالارى قازاقستانعا 311 ملن دوللاردىڭ ازىق-تۇلىگىن ەكسپورتتاعان. ال بيىلعى قاڭتار-تامىز ارالىعىندا 187 ملن دوللاردىڭ ازىق-تۇلىگى اكەلىندى. اسىرەسە، ىرىمشىككە، سيىر مەن قۇس ەتىنە سۇرانىس ارتىپ تۇر. سيىر ەتى بىلتىرعىدان 2 ەسە، قۇس ەتى 1,7 ەسە، ىرىمشىككە دەگەن سۇرانىس 7% ارتقان. 2019 جىلدىڭ 8 ايىندا 27,7 ملن دوللاردىڭ ەت ونىمدەرى، 62 ملن دوللارعا ءسۇت جانە ءسۇت ونىمدەرى يمپورتتالعان.

"The Qazaq Times"