اقش تۇركياعا ەنگىزىلگەن سانكتسيانىڭ كۇشىن جويدى

اقش پرەزيدەنتى دونالد ترامپ «بەيبىتشىلىك قاينارى» اتالاتىن اسكەري وپەراتسياعا بايلانىستى تۇركياعا ەنگىزىلگەن سانكتسيانى الىپ تاستادى. بۇل تۋرالى امەريكا قارجى ۆەدومستۆوسى حابارلادى.

اق ءۇي باسشىسى تاراپتار ءوزارا كەلىسىمگە كەلگەننەن كەيىن تۇركيا سۇرياداعى كونترتەرروريستىك وپەراتسياسىن توقتاتقانىن ايتتى.» قاشىقتىعى 20 ميل (32 شاقىرىم) بولاتىن قاۋىپسىزدىك ايماعى قۇرىلدى» – دەگەن اقش پرەزيدەنتى ءسۇريا-تۇركيا شەكاراسىندا وق اتۋ توقتاتىلىپ، جاعدايدىڭ تۇراقتالعانىن ءمالىم ەتتى.

15 قازاندا كۇشىنە ەنگەن اقش-تىڭ سانكتسياسىنا تۇركيانىڭ قورعانىس جانە ەنەرگەتيكا مينيسترلىكتەرى ىلىنگەن. سونىمەن بىرگە، بيلىكتەگى «اك» پارتيا توراعاسىنىڭ ورىنباسارى سۋلەيمان سويلۋ دا سانكتسياعا الىندى. اقش سانكتسيا ارقىلى انكاراعا قىسىم ءتۇسىرىپ، ءسۇريانىڭ سولتۇستىك-شىعىسىنداعى شابۋىلدى توقتاتۋعا شاقىرعان.

ەستەرىڭىزگە سالا كەتەيىك، 9 قازاندا تۇركيا ءسۇريانىڭ سولتۇستىگىندە «بەيبىتشىلىك قاينارى» اتالاتىن ارنايى وپەراتسيا باستاعان. تۇرىك اۆياتسياسى مەن ارتيللەرياسى كورشى ەل اۋماعىنداعى كۇرد جاساقتارىن سوققىعا الدى. اسكەري وپەراتسيانىڭ ماقساتى – لاڭكەستەرگە وڭتۇستىك شەكارادا ءدالىز قۇرۋعا جول بەرمەۋ.

"The Qazaq Times"