كورنەكى سۋرەت. فوتو: اشىق دەرەككوز

الماتى وبلىستىق سوتىنىڭ ءباسپاسوز قىزمەتى قازاقستان-قىتاي جۇمىسشىلارىنىڭ اراسىندا داۋ تۋعان «Citic Construction» كومپانياسىندا زاڭسىز جۇمىس ىستەگەن قىتايلىق يممگرانتتار تەكسەرىستەن كەيىن دەپورتاتسيالانعانىن حابارلادى.

تالدىقورعان مامانداندىرىلعان اكىمشىلىك سوتى، سونداي-اق اقسۋ اۋداندىق سوتى اكىمشىلىك قۇقىق بۇزۋشىلىق تۋرالى كودەكستىڭ 517-بابىنىڭ 2-بولىگى (شەتەلدىكتەردىڭ نەمەسە ازاماتتىعى جوق ادامداردىڭ حالىقتىڭ كوشى-قونى تۋرالى زاڭنامانى بۇزۋى) بويىنشا 70 قىتاي ازاماتىنا قاتىستى قوزعالعان  اكىمشىلىك ءىستى قاراعان.

ەستەرىڭىزدە بولسا، كەشە قوعامدىق رەزونانس تۋدىرعان، قۇزىرلى ورگاندارعا قاتىستى كولەڭكەلى تۇسى كوپ ءىس بويىنشا الماتىداعى ادام قۇقىقتارى جونىندەگى قازاقستاندىق حالىقارالىق بيۋرودا ازاماتتىق قوعام بەلسەندىلەرى مەن قامالعانداردىڭ وكىلدەرى ارنايى ءباسپاسوز جيىنىن وتكىزگەن ەدى.

ۆەدومستۆونىڭ بۇگىنگى حابارلاماسىنا قاراعاندا، 9 قازانداعى سوت شەشىمدەرىمەن قحر-نىڭ بارلىق 70 ازاماتى كىنالى دەپ تانىلىپ، ولارعا ەلدەن شىعارۋ تۇرىندە «اكىمشىلىك جازا» قولدانىلعان. بىراق مالىمدەمەدە «Citic Construction» كومپانياسىنا قاتىستى قولدانىلعان شارالار جايىندا ەشتەڭە ايتىلماعان. بەلسەندىلەردىڭ ايتۋىنشا، زاڭسىز يمميگرانتتاردى قىزمەتكە تارتىپ، كادرلىق الاۋىزدىق پەن الەۋمەتتىك الالاۋعا جول بەرگەنى ءۇشىن قازاقستاننىڭ ەڭبەك زاڭىن بۇزعان كومپانياعا بيلىك «ەشقانداي ايىپپۇل، باسقا دا شارالار قولدانباعان، تەك ەسكەرتۋ جاساعان». سوت اكتىلەرى كۇشىنە ەنىپ، شەت مەملەكەتتىڭ ازاماتتارى قازاقستان اۋماعىنان شىعارىلعان دەسەدى.

بيۋروداعى 5 قازاقستاندىققا اراشا سۇراعان جيىندا جۋرناليست، قوعام بەلسەندىسى  رىسبەك سارسەنبايۇلى ءوز سوزىندە:

– ەڭ نەگىزىگى ماسەلە، بۇل جەردە مەملەكەت ءوز ازاماتاترىنىڭ مۇددەسىن قورعاي الماي وتىر. قازاق بيلىگى قازىر ينۆەستورلاردى قۇدايىنداي كورەدى. توبەسىنە تايراڭداتىپ قويدى. قىتايمەن جاسالعان كەلىسىم-شارتتار جابىق. بۇل اشىق بولۋى كەرەك. 69 قىتاي ازاماتىنىڭ زاڭسىز جۇرۋىنە كىم جول بەردى؟ سونى انىقتاپ جازالاۋ كەرەك. ءجيى رەيد جاساۋ قاجەت. زاڭسىز جۇرگەن شەتەلدىكتەردى انىقتاۋعا قوعام بەلسەندىلەرىدە اتسالىسۋ كەرەك. مىنا توبەلەستە قىتاي ازاماتتارى «پەرىشتە» بولدى. قازاقتار – قىلمىسكەر. بۇلاي بولمايدى، – دەگەن بولاتىن.

"The Qazaq Times"