قۇقىق قورعاۋشى بەلسەندىلەر قازاقستاندا تىيىم سالىنعان قوزعالىستىڭ قارسىلىق اكتسياسىنا شىعۋعا ءۇندەۋى كەزىندە "بەلسەندىلەردى قورقىتۋ مەن قۋعىنداۋ" باستالىپ كەتتى دەپ مءالىمدەدى، بۇل تۋرالى ورتالىق ازيا جاڭالىقتار قىزمەتى جازدى.

استانا تۇرعىنى ەربول ەسحوجين 23 قازاندا پوليتسياعا تەرگەۋگە شاقىرىلىپ، بەلسەندى دۋلات اعادىلگە قارسى قوزعالعان قىلمىستىق ىسكە قاتىستى كۋالىك بەرۋىن تالاپ ەتكەن.

ەربول ەسحوجيننىڭ ادۆوكاتى ولگا ەننس ول قۇقىعىن پايدالانىپ، كۋالىك بەرۋدەن باس تارتقانىن ايتتى.

ازاماتتىق بەلسەندى ءاليا جاقىپوۆا دا 23 قازاندا پوليتسياعا تەرگەۋگە شاقىرىلعان.

قازىر Facebook جەلىسىندە ۇستالعان ازاماتتار جايىندا اقپارات جيناپ، ولارعا قۇقىقتىق كومەك كورسەتەتىن #IHaveAChoiسe #ActivistsNotExtremists توبى جۇمىس ىستەيدى. اتالعان توپتىڭ مالىمەتىنشە، 17- 21 قازان ارالىعىندا 11 بەلسەندىگە قىسىم كورسەتىلگەن. ونىڭ ىشىندە 12 قازاندا وتكەن نارازىلىق شاراسىنا قاتىسقان ەكى بەلسەندىنى الماتى سوتى 10 جانە جەتى تاۋلىككە قاماپ، تاعى بىرەۋىنە 50 500 تەڭگە (130 دوللار) ايىپپۇل سالعان.

قازاقستان بيلىگىنىڭ مالىمەتىنشە، 21 قىركۇيەكتە ەلدە تىيىم سالىنعان، قۋعىنداعى بۇرىنعى بانكير مۇقتار ءابليازوۆ جەتەكشىلىك ەتەتىن "قازاقستاننىڭ دەموكراتيالىق تاڭداۋى" (قدت) قوزعالىسىنىڭ ۇندەگەن اكتسياسىنا شىققان 100 شاقتى ادام ۇستالعان.

بيلىك قدت قوزعالىسىن زاڭسىز دەپ ەسەپتەيدى.

“The Qazaq Times”