بۇقارا سەنىمىن سەتىنەتكەن 277 ءسابيدىڭ «جاسىرىن دا جاساندى» ءولىمى

دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتىنىڭ باسشىسى ليۋدميلا بيۋرابەكوۆا قازاقستان دارىگەرلەرى ءتىرى تۋعان 277 نارەستەنىڭ ءولىمىن جاسىرعانىن مالىمدەدى.

دەنساۋلىق ساقتاۋ مينيستر ەلجان ءبىرتانوۆ سەنات وتىرسىنداعى بايانداماسىندا ەل ەستىپ كورمەگەن، ەستىگەنىن ەسەڭگىرەتەر اۋىر فاكتىمەن بولىسكەن. ونىڭ سوزىنشە، ەل دارىگەرلەرى 277 بالانىڭ ءولىمىن جاسىرعان. وتىرىستان سوڭ ليۋدميلا بيۋرابەكوۆا تىلشىلەرگە:

– ءبىز قازاقستاندا ءولى تۋعان نارەستەلەردىڭ 2018 جىلعى كورسەتكىشى بويىنشا اناليز جاسادىق. ايماقتاردىڭ پەرزەنتحانالارىندا بۇزىلماي قالعان شىنى قۇرالداردى كوتەرىپ، بالا سول شىنى اپپاراتقا سالىنعاندا دەمالىپ جاتتى ما، الدە، شىنىمەن ءولى تۋدى ما، سونى تەكسەردىك. وسى تەكسەرۋدە ايماقتاردىڭ ستاتيستيكانى جاقسارتۋ ءۇشىن بالالار ءتىرى تۋىپ، كەيىن ءولىپ قالسا دا، ونى ءولى تۋدى دەپ ەسەپتەگەن جاعدايلاردى انىقتادىق، – دەدى.

ۆەدومستۆو جۇرگىزگەن اۋديت قورىتىندىسى بويىنشا، 2018 جىلى قازاقستاندا 277 بالا ءتىرى تۋعان، بىراق، ونى دارىگەرلەر ءولى تۋدى دەپ جازعانى انىقتالعان. ءبىر قىزىعى، اتالمىش زەرتتەۋ-تەكسەرۋ اۋديتىنە ماڭعىستاۋ وبلىسى قاتىسپاعان. «سەبەبى، ماڭعىستاۋ وبلىسى شىنى اپپاراتتاردى جويىپ جىبەرگەن، بۇل دەنساۋلىق ساقتاۋ ەرەجەسىنە قايشى، بىراق ەشقانداي جازا كوزدەلمەيدى»، – دەيدى.

ونىڭ سوزىنشە، بالا ءولىمىن جاسىرعان ايماقتار قاتارىندا قىزىلوردا، جامبىل، اتىراۋ وبلىستارى الدىڭعى ورىندا. ەڭ سوراقىسى، ايماقتار ءۇشىن قىزىل شاقانىڭ ءتىرى تۋىپ ولگەنىنەن گورى، بىردەن ءولى تۋى – «ءتيىمدى» بولعان ەكەن.

باقىلاۋ كوميتەتىنىڭ باسشىسى بيۋرابەكوۆا  «انا مەن بالا ءولىمىنىڭ كورسەتكىشى بويىنشا دەنساۋلىق ساقتاۋ مينيسترلىگى مەن وبلىس اكىمدەرى اراسىندا مەموراندۋم بار. سوندىقتان، جالپى، ستاتيستيكا باسەكەگە اسەر ەتەدى. ياعني، كورسەتكىشتەر جامان بولعان سايىن، ءبىزدىڭ الەمدىك رەيتينگتەگى پوزيتسيامىز تومەندەي بەرەدى. بۇل ستاتيستيكادا ءتىرى تۋعان، بىراق ءولىپ قالعان بالا – ءبىر بولەك، ال، ءولى تۋعان بالا – باسقا ستاتيستيكا» ەكەنىن ايتادى.

"The Qazaq Times"