قازىرگى تاڭدا قازاقستاندا جارتى ميلليونعا تارتا ادام جۇمىسسىز ءجۇر. «...جۇمىسى جوقتىق – ازدىرار ادام بالاسىن» دەگەن ھاكىم ابايدىڭ قۇنى زوردان قىمبات كونسۋلتاتسياسىنا قۇلاق تۇرەر كىم بار دەسەڭشى. قايبىر جىلى قىلمىسكەردىڭ 91% – «جاڭا»، 78,6% – جۇمىسسىز ەكەنى، قىلمىسكەرلەردىڭ كوبى جۇمىسسىزدار بولاتىنى تۋرالى رەسمي مالىمەت شىققانى ەسىمىزدە.

ۇلتتىق ەكونوميكا مينيسترلىگىنە قاراستى ستاتيستيكا كوميتەتىنىڭ مالىمەتى بويىنشا، ەلدەگى ەڭبەك نارىعىنا قاتىستى جالپى جۇمىسسىزداردىڭ سانى 442 200 ازامات دەپ كورسەتىلگەن. ونىڭ تىركەلگەنى – 170 مىڭعا تارتادى-مىس. 4,8%-دان تۇسپەيتىن يا كوتەرىلمەيتىن جۇمىسسىزدىق دەڭگەيىنىڭ رەسمي كورسەتكىشىنە ساراپشىلار تۇگىلى كوپشىلىك بۇقارانىڭ دا كوڭىلى كۇماندى. ونىڭ ىشىندە 15-28 جاس ارالىعىنداعى جاستار 85 مىڭعا تاياۋ دەسەدى. ادەتتە جۇمىسسىزدىق تۋرالى وتكىر مالىمدەۋشىلەر مەن قاراپايىم ازاماتتار ءار ءتۇرلى ايىپتاۋلارمەن ءىستى بولىپ جاتادى. سونىڭ ءبىرى جۋىردا عانا بەس جىلعا باس بوستاندىعىنان ايىرىلعان جاڭاوزەندەگى جۇمىسسىزدار قوزعالىسىنىڭ بەلسەندىسى، جاستار جۇمىسسىزدىعىن كوتەرىپ جۇرگەن ەرجان ەلشىباەۆ ساياسي تۇتقىن دەپ تانىلدى. بۇل جايلى تامىزدا قۇقىق قورعاۋشى باقىتجان تورەعوجينا ءوزىنىڭ Facebook پاراقشاسىندا جاريالاعان بولاتىن.

ۆەدومستۆونىڭ «نەگىزگى الەۋمەتتىك-ەكونوميكالىق كورسەتكىشتەر مونيتورينگى» قورتىندىسىنا سايكەس كاسىپكەرلىك قىزمەتپەن اينالىساتىن شاعىن كاسىپورىنداردى ەسەپكە الماعاندا ازماتتاردىڭ ورتاشا ايلىعى جىل باسىندا 180 885 تەڭگە بولسا، ال قىركۇيەكتە 188 634 تەڭگەگە دەيىن جوعارىلاعان.

ءبىر قىزمەتكەردىڭ ورتاشا ايلىق اتاۋلى جالاقىسىنىڭ سوڭعى ءتورت جىلداعى كورسەتكىشى:

  • 2019 جىلى 188 634 ₸
  • 2018 جىلى 162 673 ₸
  • 2017 جىلى 150 827 ₸
  • 2016 جىلى 142 898 ₸

شىنىنا كەلگەندە، «قر-نىڭ الەۋمەتتىك-ەكونوميكالىق دامۋى» قىسقاشا ستاتيستيكالىق بيۋللەتەنىندە كورسەتىلگەن دەرەكتەر رەالدى احۋالدان تىم الشاق. ولاي دەيتىنىمىز، ەدەن جۋشى مەن ۆيتسە-ءمينيستردىڭ ەڭبەكاقىلارىن قوسىپ، سۋبەكتىلەردىڭ ورتاق تابىسىن ولاردىڭ سانىنا ءبولىپ ەسەپتەۋ ارقىلى ورتاشا جالاقىنى انىقتاۋ – شىندىققا كەلىڭكىرەمەيتىن ءادىس.  مەملەكەتتىك قىزمەتكەرلەر كورپۋسى مەن وزگە ەڭبەك كادرلارىن اجىراتىپ ەسەپتەيتىن جاڭا جىكتەلىم مەحانيزمى قاجەت.

قازىرگى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ شەنەۋنىكتەر عانا سەنەتىن ۋتوپيالىق كورسەتكىشتەردى شىندىققا قالاي جاقىنداتارىن الداعى ۋاقىت كورسەتەدى.

"The Qazaq Times"