جاپونيا پارسى شىعاناعىنا اسكەر جىبەردى

جاپونيا ۇكىمەتى ورمۋز بۇعازىنا اسكەر جىبەرۋ تۋرالى شەشىم قابىلدادى. بىراق، ارنايى كۇش قۇرىلىمدارىن قۇرۋ اقش كواليتسياسى شەڭبەرىندە قابىلدانباعان. بۇل تۋرالى Asahi Shimbun باسىلىمى حابارلادى.

جاپوندىق باق بۇدان بۇرىن تەڭىز كۇشتەرىنىڭ ءبىر اسكەري كەمەسىن جىبەرۋدى جوسپارلاعانى تۋرالى مالىمدەگەن. وسى رەتتە جاپونيا مينيسترلەر كابينەتىنىڭ باس حاتشىسى ەسيحيدە سۋگا ءباسپاسوز ءماسليحاتىندا جاپون بيلىگى قازىرگى ۋاقىتتا ارنايى اسكەري قۇرىلىمداردى ورمۋز بۇعازىنا جىبەرۋ مۇمكىندىگىن شىنىمەن قاراستىراتىنىن ايتقانمەن، ءتيىستى شەشىم قابىلدانعانىن راستامادى. «ۇلتتىق قاۋىپسىزدىك كەڭەسىنىڭ وتىرىسىندا پرەمەر-مينيستر سيندزو ابە بۇل ماسەلەنى قاراۋعا وكىم بەردى. تاياۋ شىعىستاعى بەيبىتشىلىك پەن تۇراقتىلىق ءبىزدىڭ ەلىمىزدى قوسا العاندا، بۇكىل حالىقارالىق قاۋىمداستىق ءۇشىن وتە ماڭىزدى»، – دەدى ول.

پارسى شىعاناعى ايماعىنداعى جاعداي 19 شىلدەدە شيەلەنىسكەن. بريتاندىق تۋ ىلىنگەن Stena Impero تانكەرىن ورمۋز بۇعازىندا يسلام رەۆوليۋتسياسى كۇزەت كورپۋسى (كسير، يران قك ەليتالىق بولىكتەرى) كۇشتەرى تۇتقىنداعان بولاتىن. كسير مالىمدەمەسىنە سايكەس، تانكەر «حالىقارالىق ەرەجەلەردىڭ بۇزىلۋىنا بايلانىستى» تۇتقىندالعان. كەيىننەن ۋاشينگتون پارسى شىعاناعى ايماعىندا كەمە قاتىناسىنىڭ ەركىندىگىن قامتاماسىز ەتۋ ماقساتىندا كواليتسيا قۇراتىنىن جاريالادى. اتالعان كواليتسياعا مۇشە بولۋعا اۋستراليا، باحرەين، ۇلىبريتانيا، ساۋد ارابياسى جانە ءباا نيەت بىلدىرگەن.

"The Qazaq Times"