يران دەمالىس كۇندەرى ءۇندى مۇحيتىندا كەمەگە قارسى بالليستيكالىق زىمىران سىناقتارىن وتكىزدى. تەھراننىڭ بۇل قادامى اقش-پەن يەلەنىستى كۇشەيتۋى مۇمكىن دەپ بولجانۋدا.

زىمىران سىناقتارىن يران رەۆوليۋتسيا شاقشىلارىنا قاراستى اسكەري-تەڭىز كۇشتەرى 16 قاڭتار، سەنبى كۇنى ءۇندى مۇحيتىندا وتكىزگەن. بۇل تۋرالى يراننىڭ مەملەكەتتىك تەلەارنالارى حابارلادى. كەمەگە قارسى بالليستيكالىق زىمىرندار 1800 شاقىرىم قاشىقتىقتاعى «جاۋ كەمەسىنە» ءدال سوققى بەرگەن. بىراق، حابارلاردا يراننىڭ بالليستيكالىق زىمىرانى تۋرالى تولىق مالىمەت بەرىلمەگەن.

ال، جۇما كۇنى باستالعان اسكەري وقۋ-جاتتىعۋ كەزىندە رەۆوليۋتسيا ساقشىلار كورپۋسىنا تيەسىلى اۋە كۇشتەرى جاساندى «جاۋ بازاسىنا» باعىتتاپ ەكى بالليستيكالىق زىمىران جانە دروندار ۇشىرعان بولاتىن. يران مەملەكەتتىك ارنالارى تاراتقان سۋرەتتەردەن يراننىڭ وتاندىق ۇشقىشسىز ۇشۋ اپپاراتتارىنىڭ نىساناعا ءتيىپ جارىلعانىن كورۋگە بولادى.

سوڭعى بىرەر اپتادا يران تەڭىز جانە اۋەدەگى اسكەري وقۋ-جاتتىعۋلارىن كۇشەيتە ءتۇستى. وتكەن بەيسەنبىدە يران تەڭىز كۇشتەرى ومان شىعاناعىندا وتكىزگەن جاتتىعۋ كەزىندە قاناتتى زىمىرانداردى ۇشىرعان. اقش-تىڭ يادرولىق سۇڭگۋىر كەمەسى ومان شىعاناعىنداعى جاتتىعۋدى باقىلاۋعا العانى تۋرالى مالىمەتتەر بار. اقش اسكەري-تەڭىز كۇشتەرى وتكەن ايدا «دجوردجيا» يادرولىق سۇڭگۋىر كەمەسىن پارسى شىعاناعىنا جىبەرەتىنىن مالىمدەگەن بولاتىن.

اقش-تىڭ يران شەكتەسكەن شىعاناققا يادرولىق كەمەسىن جىبەرۋى، سونداي-اق، اتالعان ايماققا B-52 بومبالاۋشى ۇشاقتارىن، USS Nimitz ۇشاق تاسىمالداۋشى كەمەلەرىن جىبەرۋى، وعان قاراتا يراننىڭ وڭتۇستىك كورەيالىق مۇناي تاسىمال كەمەسىن ۇستاۋى، يادرولىق قارۋ جاساۋعا دايىن ۋران ءوندىرۋى، اسكەري وقۋ-جاتتىعۋلارىن كۇشەيتۋى ەكى ەل اراسىنداعى ونسىزدا قىزىپ تۇرعان قايشىلىقتى ورشىتەدى دەپ كۇتىلۋدە.

“The Qazaq Times”