پرەزيدەنت قاسىم-جومارت توقاەۆ جاپونياداعى «حاگيبيس» تايفۋنىنا بايلانىستى پرەمەر-مينيستر سيندزو ابەگە كوڭىل ايتۋ جەدەلحاتىن جولدادى.

اقوردانىڭ ءباسپاسوز قىزمەتىنىڭ حابارلاۋىنشا، جەدەلحاتتا: «قازاقستان حالقىنىڭ جانە ءوز اتىمنان جاقىندارىنان ايىرىلعان ازالى وتباسىلارعا قايعىلارىنا ورتاقتاسىپ كوڭىل ايتامىن. اپاتتا زارداپ شەككەندەردىڭ تەز ارادا ساۋىعۋىن تىلەيمىن»،– دەلىنگەن.

جاپونيادا سەنبىدە باستالعان «حاگيبيس» تايفۋنىنان وپات بولعاندار سانى 66-عا جەتتى. وسىعان دەيىن 53 ادامنىڭ قازا تاپقانى تۋرالى حابارلانعان بولاتىن. تابيعي اپاتتان 200-دەن استام ازامات ءتۇرلى جاراقات العان. تاعى 13 كىسى ءىز-ءتۇزسىز جوعالىپ كەتكەن. ەل بويىنشا 138 مىڭداي ءۇي سۋسىز قالعان. تاعى 34 مىڭ ۇيدە جارىق جوق. ال تولاسسىز جاڭبىر سالدارىنان وزەندەر ارناسىنان تاسىپ، بوگەتتەر بۇزىلعان. ناتيجەسىندە تۇرعىن ءۇي كەشەندەرى سۋ استىندا قالعان.

جاپونيا ۇكىمەتى ەلدە 1958 جىلدان بەرگى ەڭ قاتتى «تايفۋن» داۋىلى بولۋى مۇمكىن دەپ قاۋىپتەنىپ وتىر. ول ۋاقىتتا «كانوگاۆا» بورانى 1200 ادامنىڭ جانىن جالماعان بولاتىن.

"The Qazaq Times"