فوتو: https://f.azh.kz

قازاقستاندا «اشىق اسپان» رەجيمى اياسىندا جاڭا 14 حالىقارالىق اۋە رەيسى اشىلادى. بۇل تۋرالى قر يندۋستريا جانە ينفراقۇرىلىمدىق دامۋ مينيسترلىگىنىڭ حابارلادى.

ۆيتسە-مينيستر بەرىك قاماليەۆ: «حالىقارالىق باعىتتارداعى باسەكەنى ارتتىرۋ جانە اۆيابيلەتتەردىڭ قۇنىن ارزانداتۋ ماقساتىندا وتكەن جىلدىڭ 1 قاراشاسىندا قر پرەزيدەنتىنىڭ تاپسىرماسىمەن ەلىمىزدىڭ 11 اۋەجايىندا «اشىق اسپان» رەجيمى ەنگىزىلدى. بۇگىندە قازاقستان 26 ەلمەن 99 حالىقارالىق باعىت بويىنشا اۋە قاتىناسىن جۇزەگە اسىرۋدا»، – دەيدى.

ۆەدومستۆونىڭ ايتۋىنشا، «اشىق اسپان» رەجيمىن ەنگىزۋ ءتۋريزمنىڭ دامۋىنا، «استانا» حالىقارالىق قارجى ورتالىعىنىڭ كولىكتىك قولجەتىمدىلىكتى ارتتىرۋعا، جاڭا شەتەلدىك تاسىمالداۋشىلاردى تارتۋعا، جاڭا حالىقارالىق باعدارلاردىڭ اشىلۋىنا، اۆيابيلەتتەر قۇنىنىڭ تومەندەۋىنە جانە اۋە كولىگىنىڭ حالىقتىڭ قالىڭ توبىنا قولجەتىمدى بولۋىنا ىقپال ەتەدى.

وسى رەتتە Qatar Airways, LOT, Salam Air, Jazeera Airways, Air Asia جانە باسقا دا ءىرى كومپانيالار استانا مەن الماتىنى دوحا، ماسكات، كۋالا-لۋمپۋر جانە باسقا دا قالالارمەن بايلانىستىرادى. سونىمەن قاتار بيىلدان باستاپ Air Astana اۋە كومپانياسى الماتى-پاريج، الماتى-مۋمباي باعىتى بويىنشا جاڭا رەيس اشۋدى جوسپارلاپ وتىر.

ايتا كەتەيىك، 2019 جىلدىڭ باسىنان بەرى قازاقستاندىق جانە شەتەلدىك اۋە كومپانيالارى 12 حالىقارالىق اۋە رەيسىن اشتى. حالىققا جولداۋىندا اۋە بيلەتى باعاسىنىڭ قىمبات ەكەنىن ايتقان پرەزيدەنت قاسىم-جومارت توقاەۆ وسى ماسەلەنى شەشۋ جونىندە بۇيرىق بەرگەن بولاتىن. كەيىننەن سول كەزدەگى قر يندۋستريا جانە ينفراقۇرىلىمدىق دامۋ ءمينيسترى رومان سكليار پرەزيدەنتتىڭ «ۇشاق بيلەتى قىمبات» دەگەن سىنىنا قاتىستى ماسەلەنىڭ رەتتەلەتىنىن ايتقان.

"The Qazaq Times"