پرەزيدەنت توقاەۆ رەسەيگە بارادى

بۇگىن پرەزيدەنت قاسىم-جومارت توقاەۆ ۆلاديمير ءپۋتيننىڭ شاقىرۋىمەن رەسەيدىڭ سوچي قالاسىنا ساپارلاپ بارادى.

ەكى ەل باسشىسى ون التىنشى رەت ۇيىمداستىرىلىپ وتىرعان «ۆالداي» حالىقارالىق پىكىرتالاس كلۋبىنىڭ وتىرىسىنا قاتىسادى. شارا الەمدىك ساياسي قۇرىلىمداعى شىعىس ەلدەرىنىڭ ءرولىن تالقىلاۋعا ارنالادى. سونىمەن قاتار، ەۋرازيا كەڭىستىگىندەگى ورتاق ءىس-قيمىلداردىڭ كەلەشەگى مەن تاياۋ شىعىس ماسەلەلەرى قارالادى. پلەنارلىق وتىرىستا قازاقستان مەن رەسەي باسشىلارىنان بولەك، ءازىربايجان پرەزيدەنتى، يوردانيا كورولى جانە فيليپپين پرەزيدەنتى ءسوز سويلەيدى. مالىمەتتەر بويىنشا، وتىرىس الاڭىندا پرەزيدەنت بىرقاتار ەكىجاقتى كەزدەسۋ دە وتكىزۋى مۇمكىن.
«ۆالداي» حالىقارالىق پىكىرسايىس كلۋبىنىڭ وتىرىسى 30 قىركۇيەك پەن 3 قازان ارالىعىندا وتەدى. بيىلعى كەزدەسۋدىڭ تاقىرىبى – «شىعىس شاپاعاتى جانە الەمدىك ساياسي قۇرىلىم». پانەلدىك سەسسيا 3 قازاندا وتەدى، ونىڭ تاقىرىبى – «الەمدىك قۇرىلىم: شىعىستىڭ كوزقاراسى».

اتالعان پىكىرسايىس 2003 جىلدان بەرى حالىقارالىق ماسشتابتا ۇيىمداستىرىلىپ كەلەدى. ارنايى فورماتقا سايكەس، پلەنارلىق سەسسياعا قاتىسۋشىلار الدىمەن ءسوز سويلەيدى، سودان كەيىن ساراپشىلار مەن پىكىرسايىس مودەراتورىنىڭ سۇراقتارىنا جاۋاپ بەرەدى.

"The Qazaq Times"