رەسەي مەن قىتاي تاراپىنان امەريكانىڭ عارىش سالاسىنا قاۋىپ ارتۋدا جانە اقش قورعانىس مينيسترلىگى بۇعان تويتارىس بەرۋ ءۇشىن ءوز جۇمىسىن قايتا قۇرۋى ءتيىس. بۇل تۋرالى ۋاشينگتوندا وتكەن اتلانتيكالىق كەڭەستە اقش قورعانىس ءمينيسترى كومەكشىسىنىڭ ورىنباسارى ستيۆەن كيتەي مالىمدەدى.

«ەگەر ءبىز عارىش سالاسىندا كەزدەسەتىن قاۋىپ-قاتەرلەرگە زەر سالساق، ولاردىڭ ۋاقىت وتكەن سايىن ارتىپ كەلە جاتقانىن بايقايمىز. قاۋىپتىڭ بار ەكەندىگى ناقتى ءمالىم جانە سالدارى ەلەۋلى. قازىر قىتاي مەن رەسەي، اسىرەسە، عارىشقا قارسى قورعانىس كۇشىن ارتتىرۋدا، بۇل وتە ماڭىزدى. قۇراما شتاتتارى قۇر قالماۋى ءتيىس. الەم وزگەرەدى، قورعانىس مينيسترلىگى دە ونىمەن بىرگە وزگەرۋى ءتيىس. بۇل وزگەرىستەرگە عارىشتى قوسىمشا فۋنكتسيا رەتىندە قاراپ قانا قويماي، باسەكەلەستىككە نازار اۋدارىپ، كۇشىمىزدى ورىستەتۋىمىز ماڭىزدى»، – دەدى پەنتاگون وكىلى. سونىمەن قاتار، ستيۆەن كيتەي رەسەي مەن قىتايدىڭ عارىش سالاسىنداعى دايىندىعى تەك جەردەگى عانا ەمەس، بولاشاقتا قاقتىعىستار مەن داعدارىستاردىڭ ارتۋىنا اكەپ سوعاتىنىن اتاپ ءوتتى.

كۇنى بۇگىنگە دەيىن اقش عارىش سالاسىندا عانا ەمەس، ۇلتتىق قاۋىپسىزدىككە قارسى ءىس-قيمىلعا باراتىن مەملەكەتتەر ءتىزىمىن جاريالاپ، قورعانىس سالاسىنىڭ ماماندارى دابىل قاعىپ كەلەدى. وسىعان بايلانىستى 6 قىركۇيەكتە امەريكا قارۋلى قۇشتەر شتابى كوميتەتىنىڭ توراعاسى، گەنەرال دجوزەف دانفورد حالىقارالىق كەڭەس وتىرىسىندا: «1990 جىلى اقش عارىشتا اسكەري سالانى دامىتا باستاعان كەزدە، ەشقانداي قارسىلاستاردىڭ كەدەرگى جاساماۋىن ءجىتى قاداعالاعان بولاتىن. قازىرگى ۋاقىتتا كوسموس – ناعىز باسەكە الاڭى. وسى باعىتتا قۇراما شتاتتارى ءۇشىن باستى قارسىلاس، ءارى قاۋىپ ءتوندىرۋشى مەملەكەتتەر قاتارىندا رەسەي، قىتاي، سولتۇستىك كورەيا جانە يران بار»، – دەپ مالىمدەگەن.

"The Qazaq Times"