"وتانداستار قورىنىڭ" تالقى جينالىسى. فوتو: "وتانداستار قورى" كەاق.

شەتەلدەگى قانداستارعا «قازاق كارتاسى» دەگەن قۇجات بەرىلۋى مۇمكىن. كەشە ەلوردادا وتكەن «وتانداستار قورى» كەاق-نىڭ تالقى وتىرىسىندا وسىنداي ۇسىنىستار جاسالدى. «وتانداستار قورى» اتالعان قۇجاتتى شەتەلدەگى قازاقستان ەلشىلىكتەرى ارقىلى بەرۋدى ۇسىنىپ وتىر.

«قازاق كارتاسى» جانە وزگە دە قانداستار ماسەلەسىنە قاتىستى بىرقاتار زاڭ جوبالارى، كەشە ەل استاناسىندا «وتانداستار قورى» كەاق جانىنان تۇراقتى جۇمىس ىستەيتىن كەڭەسشى القا رەتىندە قۇرىلعان قوعامدىق كوميسسيانىڭ وتىرىسىندا تالقىلانعان.

«وتانداستار قورى» ءباسپاسوز قىزمەتىنىڭ حابارلاۋىنشا، تالقى وتىرىسىندا ەلگە ورالعان قانداستاردىڭ قۇجاتتارىن رەتتەيتىن قازاقستاندىق زاڭناما جۇيەسى جانە شەتەلدەگى قازاقتاردى مەملەكەتتىك قولداۋ جونىندەگى زاڭ جوباسى تالقىعا سالىنعان. سونداي-اق، قر ءىىم كوشى-قون قىزمەتىنىڭ قۇزىرەتىندەگى قىزمەت كورسەتۋدى وڭتايلاندىرۋ ماسەلەلەرى قاراستىرىلعان.

ايتا كەتەيىك، «وتانداستار قورى» اقپارات جانە قوعامدىق دامۋ مينيسترلىگىمەن بىرلەسە وتىرىپ شەتەلدەگى قازاقتاردى قولداۋ جانە ەرىكتى قونىس اۋدارۋ ماسەلەلەرىن رەتتەۋگە باعىتتالعان زاڭ جوباسىن ازىرلەۋ ۇستىندە.

“The Qazaq Times”