رەسەيدىڭ «اگرەسسيالىق ساياساتى»: زەلەنسكي باتىس ەلدەرىنەن كومەك سۇرادى

ۋكراينا پرەزيدەنتى ۆلاديمير زەلەنسكي بۇۇ باس اسسامبلەياسىنىڭ 74-ءشى سەسسياسىندا رەسەيدى قىرىم اننەكسياسىنا قاتىستى ايىپتاپ، ۋكرايناعا قارسى اگرەسسيالىق ساياسات جۇرگىزىپ وتىر دەدى. زەلەنسكي بايانداماسىنىڭ نەگىزگى ءتۇيىنى – الداعى جىلدارى ۋكراينانىڭ رەسەيدەن ىرگەسىن اۋلاق سالىپ، باتىس ەلدەرىمەن بايلانىستى نىعايتۋ دەۋىمىزگە بولادى.

«دونباسستاعى سوعىس بەس جىل بويىنا جالعاسىپ كەلەدى. رەسەيدىڭ قىرىمدى اننەكسيالاعانىنا دا بەس جىل. بۇگىن، حالىقارالىق قۇقىقتىڭ مىڭداعان باعىتتارى جانە الەمدى قورعاۋعا ارنالعان جۇزدەگەن ۇيىمدار بار كەزدە، ءدال وسى ءبىزدىڭ ەلىمىز ءوز ازاماتتارىن جوعالتىپ، ءوزىنىڭ ەگەمەندىگى مەن اۋماقتىق تۇتاستىعىنا قارسى ساياساتتىڭ قۇربانى بوپ وتىر. وسىعان دەيىن 13 مىڭنان استام ادام قازا تاپتى، 30 مىڭى جارالاندى، 1,5 ملن ادام ءوز ۇيلەرىن تاستاپ كەتۋگە ءماجبۇر بولدى. جانە جىل سايىن بۇل ساندار ءوسىپ وتىر»، – دەدى ول.

الەمدە اشىق شايقاستاردىڭ بوپ جاتقانىن ايتقان ول، رەسەيدىڭ ءالى كۇنگە دەيىن اگرەسسيالىق باعىتتى ۇستانتىنىنا توقتالدى. سونىمەن قاتار، مەملەكەت باسشىسى لاۋازىمىنداعى ونىڭ باستى مىندەتى دونباسستاعى سوعىستى اياقتاۋ جانە قىرىمدى قايتارۋ ەكەنىن مالىمدەدى. «سوعىستى اياقتاۋ، بارلىق وككۋپاتسيالانعان ۋكراين تەرريتوريالارىن قايتارۋ مەنىڭ باستى مىندەتىم»، – دەدى ول. تۇپكى ماقساتتىڭ ورىندالۋى ءۇشىن اقش جانە ەۋروپا ەلدەرىنەن كومەك سۇرادى.

بۇعان دەيىن زەلەنسكيدىڭ ءىزاشارى پەتر پوروشەنكو دا ءار ءتۇرلى حالىقارالىق شارالاردا رەسەي ساياساتىن ايىپتاپ، ناقتى دالەلدەر كەلتىرە بايانداما جاسايتىن.

ۋكراينا پرەزيدەنتى سونداي-اق حالىقارالىق قاتىناستاردىڭ قازىرگى زامانعى ەرەجەلەرىن قايتا قاراستىرۋ جانە حالىقارالىق ۇيىمداردى جاڭارتۋ قاجەت دەدى. الەمدە ورىن الىپ وتىرعان شيەلەنىس وشاقتارىنىڭ جاھاندىق ماڭىزى بار ەكەنىن ايتقان زەلەنسكي: «بۇگىنگى جاڭا الەمدە ءبىزدىڭ مەملەكەتىمىز ءوز اۋماعىنىڭ ءبىر بولىگىن جوعالتىپ، كۇن سايىن ءوز ازاماتتارىنان ايىرىلىپ وتىر. سول سەبەپتى ۋكراينا قازىرگى زامانعى الەمدىك ەرەجەلەردى قايتا ويلاستىرۋ قاجەتتىلىگى تۋرالى نەلىكتەن ايتا المايدى؟ ءبىز حالىقارالىق ينستيتۋتتاردىڭ، اتاپ ايتقاندا بۇۇ بەدەلىنە كۇمان كەلتىرمەيمىز، بىراق ساياسي تەتىكتەردىڭ ءمىنسىز ەمەستىگىن مويىنداۋىمىز كەرەك. قوعامعا ساي، حالىققا ىڭعايلى بولۋى ءۇشىن الەمدىك ءتارتىپتى، باعىتتاردى جاڭارتۋىمىز قاجەت»، – دەدى ول.

2014 جىلى اقپاندا ۋكرايناداعى مەملەكەتتىك توڭكەرىس جانە پرەزيدەنت ۆيكتور يانۋكوۆيچتىڭ بيلىكتەن شەتتەتىلۋىنەن كەيىن ەلدەگى ورىس ءتىلدى تۇرعىندار باسىم ايماقتاردا جاپپاي نارازىلىقتار باستالدى. كيەۆ بيلىگى سول جىلى ساۋىردە دونباسستا اسكەري وپەراتسيا باستادى. ايماقتا اۋقىمدى گۋمانيتارلىق اپات ورىن الدى. سول ۋاقىتتان بەرى ۋكراينا بيلىگى رەسەي بيلىگىن جانە ۆلاديمير پۋتين ساياساتىن ايىپتاپ كەلەدى. ەۋروپا ەلدەرى مەن اقش تا رەسەيدەن اگرەسسيالىق ساياساتتى توقتاتۋدى تالاپ ەتكەن.

"The Qazaq Times"