قازاقستان پرەزيدەنتى قاسىم-جومارت توقاەۆ بۇۇ باس اسسامبلەياسى 74-ءشى سەسسياسىنىڭ رەسمي ءىس-شارالارى اياسىندا اقش پرەزيدەنتى دونالد ترامپپەن كەزدەسۋ وتكىزدى.

اقوردا ءباسپاسوز قىزمەتىنىڭ حابارلاۋىنشا، اڭگىمەلەسۋ بارىسىندا ەكى ەل كوشباسشىلارى قازاقستان مەن امەريكانىڭ كەڭەيتىلگەن ستراتەگيالىق سەرىكتەستىگىنىڭ وزەكتى ماسەلەلەرى مەن پەرسپەكتيۆالارىن تالقىلاعان. قاسىم-جومارت توقاەۆ اقش-پەن ساياسي، ساۋدا-ەكونوميكالىق، گۋمانيتارلىق، سونداي-اق وڭىرلىك جانە جاھاندىق قاۋىپسىزدىكتى قامتاماسىز ەتۋ سالالارىنداعى جان-جاقتى قارىم-قاتىناستاردى ودان ءارى نىعايتۋدى جالعاستىرا بەرەتىنىن اتاپ ءوتتى.

23 قىركۇيەكتەن باستاپ نيۋ-يوركتە بۇۇ باس اسسامبلەياسىنىڭ 74-ءشى سەسسياسى ءوتىپ جاتىر. اۋقىمدى شاراعا 114 مەملەكەت باسشىلارى مەن 80-نەن استام ەلدىڭ سىرتقى ىستەر مينيسترلەرى قاتىسىپ، جاھاندىق ماسەلەلەردى تالقىلايدى. قازاقستان پرەزيدەنتى قاسىم-جومارت توقاەۆ تا سەسسيانىڭ «كەدەيلىكتى جويۋ، ساپالى ءبىلىم بەرۋدى جانە كليماتتى ساقتاۋ ءىس-قيمىلدارى مەن جان-جاقتى تاسىلدەردى ىلگەرىلەتۋ ءۇشىن كوپجاقتى كۇش-جىگەردى شوعىرلاندىرۋ» تاقىرىبىمەن وتەتىن جالپى پىكىرسايىسىندا بايانداما جاسادى.

"The Qazaq Times"