Қазақстан президенті Қасым-Жомарт Тоқаев БҰҰ Бас Ассамблеясы 74-ші сессиясының ресми іс-шаралары аясында АҚШ президенті Дональд Трамппен кездесу өткізді.

Ақорда баспасөз қызметінің хабарлауынша, әңгімелесу барысында екі ел көшбасшылары Қазақстан мен Американың кеңейтілген стратегиялық серіктестігінің өзекті мәселелері мен перспективаларын талқылаған. Қасым-Жомарт Тоқаев АҚШ-пен саяси, сауда-экономикалық, гуманитарлық, сондай-ақ өңірлік және жаһандық қауіпсіздікті қамтамасыз ету салаларындағы жан-жақты қарым-қатынастарды одан әрі нығайтуды жалғастыра беретінін атап өтті.

23 қыркүйектен бастап Нью-Йоркте БҰҰ Бас ассамблеясының 74-ші сессиясы өтіп жатыр. Ауқымды шараға 114 мемлекет басшылары мен 80-нен астам елдің сыртқы істер министрлері қатысып, жаһандық мәселелерді талқылайды. Қазақстан президенті Қасым-Жомарт Тоқаев та сессияның «Кедейлікті жою, сапалы білім беруді және климатты сақтау іс-қимылдары мен жан-жақты тәсілдерді ілгерілету үшін көпжақты күш-жігерді шоғырландыру» тақырыбымен өтетін жалпы пікірсайысында баяндама жасады.

"The Qazaq Times"