قىركۇيەك ايىنىڭ 19-ى كۇنى «ءپۋتيندى كرەملدەن قۋماق بولعان» ساحا باقسىسى الەكساندر گابىشەۆ جوعالىپ كەتتى.

Znak.com سايتىنىڭ مالىمەتىنشە، گابىشەۆتى يركۋتسك وبلىسىنداعى ۆىدرينو لاگەرىنەن قىركۇيەكتىڭ 18-ىنەن 19-ىنا قاراعان ءتۇنى اۆتومات پەن رەزەڭكە تاياق ۇستاعان ءبىر توپ ادام ۇستاپ اكەتكەن. ازىرگە ونىڭ قايدا ەكەنى بەلگىسىز. جاقتاستارى باقسىنى ارنايى جاساق ساربازدارى ۋلان-ۋدە قالاسىنا الىپ كەتتى دەپ بولجايدى.

جۋرناليست بوريس ۆەتروۆ سوزىنشە، باقسىنىڭ ۇستىنەن قىلمىستىق ءىس قوزعالىپ، پسيحياتريالىق ساراپتاما تاعايىندالعان. بۋرياتيا تەرگەۋ كوميتەتى گابۆشەۆتىڭ ۇستالۋىنا وزدەرىنىڭ قاتىسى جوق ەكەندىگىن ايتتى. يركۋتسك ايماقتىق ىشكى ىستەر باسقارماسى ازىرگە اتالمىش وقيعاعا بايلانىستى ەشقانداي مالىمدەمە جاساعان جوق.

الەكساندر گابىشەۆ ءتورت ايدان بەرى قيىر شىعىستان ماسكەۋگە قاراي جاياۋ ءجۇرىپ كەلەدى. ونىڭ پىكىرىنشە، «رەسەي پرەزيدەنتى ۆلاديمير پۋتين قارا كۇشتەردەن پايدا بولعان جانە ونىمەن تەك باقسى عانا كۇرەسە الادى». ول وسى ۋاقىتقا دەيىن 2800 شاقىرىم جول ءجۇرىپ، جولشىباي كەزدەسكەن ادامدارعا ۇگىت-ناسيحات جۇمىستارىن جۇرگىزگەن.

"The Qazaq Times"