بۇگىن 2009 جىلى تۇتقىندالىپ، جەمقورلىق ايىبىمەن 14 جىلعا سوتتالعان  مۇحتار جاكىشەۆتىڭ ىسىنە قاتىستى  وسكەمەندە سوت وتىرىسى ءوتتى. 21:07-دە وقىلعان ۇكىم بويىنشا اپپەلياتسيالىق شاعىم قاناعاتتاندىرىلمادى.  

تۇستەن كەيىن باستالعان اپەللياتسيالىق سوت جاكىشەۆتىڭ قاتىسۋىنسىز، جابىق تۇردە جۇرگىزىلدى. وسىمەن ءۇشىنشى رەت وتكىزىلگەن سوتتا سۋديا تانىمال جازالانۋشىنىڭ ءوزى سويلەۋىنە «مۇمكىندىك جوق ەكەنىن» ايتىپ، ادۆوكاتتىڭ وتىرىستى كەيىنگە قالدىرۋ ءوتىنىشىن قاناعاتتاندىرمادى. سيىرقۇيىمشاقتانعان قوعامنىڭ رەاكتسياسىن تۋدىرعان ىسكە قاتىسۋشى جاكىشەۆتىڭ ادۆوكاتى بەيسەكەەۆ بارلىق ءىستى قاراۋشى وبلىستىق سۋديالارعا سەنىمسىزدىك تانىتىپ، ءوز نارازىلىعىن ءبىردىردى.

رەسپۋبليكانىڭ ءار وڭىرىنەن بەلگىلى "ساياسي تۇتقىندى" قولداۋ ءۇشىن كەلگەن بەلسەندىلەر سوت شەشىمىنە نارازىلىق ءبىلدىرىپ، "لاعنەت", "بوستاندىق", "قارعىس اتسىن", "جۇيە اۋىسسىن" دەپ ۇرانداسىپ ايقايلادى.

شىلدەنىڭ 24-ءسى  سەمەي قالالىق №2 سوتى تۇرمە دارىگەرلەرىنىڭ راستاۋىمەن دەنساۋلىق جاعدايىنا بايلانىستى ونىڭ مەرزىمىنەن بۇرىن شارتتى بوستاندىققا شىعارۋ تۋرالى ءوتىنىشىن قاناعاتتاندىرۋدان باس تارتقان بولاتىن. قىركۇيەكتىڭ 10-ى كۇنى دە بەس ساعاتتان اسا بىرنەشە ۇزىلىستەردەن كەيىن سۋديا جاكىشەۆتىڭ ناۋقاستىعىنا قاراماستان بۇرىنعى شەشىمدى وزگەرىسسىز قالدىردى.

سوڭعى كەزدەرى «قازاتومونەركاسىپ» ۇلتتىق كومپانياسىنىڭ بۇرىنعى باسشىسى، ون جىلدان استام ۋاقىتىن تۇرمەدە وتكىزىپ، قاماۋدا وتىرعان ءۇشىنشى توپتاعى مۇگەدەكتىك دەرتىنە شالدىققان مۇحتار جاكىشەۆتى قولداپ، بوستاندىققا شىعارۋدى تالاپ ەتكەن نارازىلىق شەرۋلەرى جيىلەي تۇسكەن. سەيسەنبى كۇننىڭ وزىندە ەلدەگى الماتى، اقتاۋ، وسكەمەن قالالارى مەن ەلورداسىندا «مۇحتار جاكىشەۆتى بوستاۋ» تالابىمەن بىرنەشە نارازىلىق شارالارى ءوتتى.

سونىمەن قاتار، 9 قىركۇيەك جەنەۆاداعى بۇۇ، بۇگىن Freedom House حالىقارالىق قۇقىق قورعاۋ ۇيىمى قازاقستان بيلىگىن ساياسي تۇتقىنداردى بوساتۋعا شاقىردى. Freedom House حالىقارالىق قۇقىق قورعاۋ ۇيىمى استانادان «قازاتومونەركاسىپ» كومپانياسىنىڭ بۇرىنعى باسشىسى، تەمىر توردا وتىرعانىنا 10 جىلدان اسقان 56 جاستاعى مۇحتار جاكىشەۆتى دەرەۋ بوساتۋىن تالاپ ەتتى. ەستەرىڭىزدە بولسا، قۇقىق قورعاۋشىلار تاراپىنان «جازىقسىز ساياسي استارمەن ءىستى بولدى» دەپ باعالانعان جاكىشەۆ ىسىنە قاتىستى وسىعان دەيىن 2015 جىلى بۇۇ ادام قۇقىعى كوميتەتى دەرەۋ بوساتۋىن سۇراپ، ەسكەرتۋ جاساعان ەدى.

ساياسي وزگەرىستەر جيىلەگەن تۇستا حالىقتىڭ ساياساتقا نازارى اۋىپ، بيلىككە ناقتى قۇقىقتىق تالاپتار قويا باستادى. وزگە ماسەلەلەردەن بولەك ءبىر «ساياسي تۇتقىنداردى بوساتۋ» تاقىرىبى بويىنشا ءۇش ايدىڭ وزىندە ەلدىڭ ءار ايماعىندا 40-قا تارتا پيكەت-ميتينگ، نارازىلىقتار كورىنىس تاپقان.

"The Qazaq Times"