مۇحتار جاكىشەۆ. فوتو: الەۋمەتتىك جەلىدەن

سەمەي قالاسىنىڭ سوتىنىڭ شەشىمىمەن ون جىلدان استام تۇرمەدە مۇحتار جاكىشەۆ بۇگىن بوساپ شىقتى.  

بەيسەنبى كۇنى ساعات 10:25-تە اباقتىدان شىققان مۇحتار جاكىشەۆتى جاقتاستارى مەن قولداۋشىلارى كۇتىپ الىپ، تىلەۋلەستىگىن ءبىلدىردى.

بۇعان دەيىن 1998-2009 جىلدار ارالىعىندا «قازاتومونەركاسىپ» ۇلتتىق كومپانياسىن ون جىلداي باسقارعان مۇحتار جاكىشەۆ 2010 جىلداردىڭ باسىندا ەكى قىلمىستىق ءىس بويىنشا 14 جىلعا سوتتالعان بولاتىن.  ونىڭ ۇزاق جىلعا سوتتالۋىن ساراپشىلار ءارتۇرلى تۇجىردى: ءبىرى 2000 جىلدارى ونىڭ ەكس-بانكير مۇحتار ابليازوۆقا اراشا بولعانىن ايتسا، ەندى ءبىرى ونىڭ ۋران وندىرىسىندە رەسەيمەن باقتالاس بولۋىن العا تارتادى.

ساراپشىلار 2023 جىلدىڭ 20 مامىرىندا بوساتىلۋى ءتيىس جاكىشەۆتىڭ ءۇشىنشى اپپەلياتسيالىق شاعىمىن قاناعاتتاندىرۋى - ازاماتتىق قوعام تالابىنىڭ جەمىسى دەسە، تاعى ءبىرى «توقاەۆتىڭ ەل الدىنداعى ۇپايىن تۇگەندەۋ» ءادىسى دەپ سانايدى. سوتقا اقتاۋ، سەمەي، شىمكەنت، ارىس، الماتى، ورال ت.ب. قالالارىنان قولداۋشىلار قاتىسقان ەدى.

اباقتى الدىندا جاكىشەۆتىڭ شىعۋىن كۇتىپ تۇرعان قولداۋشىلارى. فوتو: Informburo.kz

2015 جىلى 6 قاراشا بۇۇ-نىڭ ادام قۇقىقتارى كوميتەتى قازاقستاندى «ازاماتتىق جانە ساياسي قۇقىق تۋرالى حالىقارالىق پاكتى» بويىنشا، 2018 جىلى 15 ناۋرىزدا ورتالىق ازياداعى ادام قۇقىقتارى قاۋىمداستىعى، تاعى وزگە دە قۇقىق قورعاۋ ۇيىمدارى ونىڭ نەگىزسىز سوتتالعانىن ايتىپ، بيلىكتەن ونى دەرەۋ بوساتۋىن تالاپ ەتكەن. ينتەللەكتۋال وتباسىدان شىققان جاكىشەۆتى كەزىندەگى «اتوم ونەركاسىبىن دامىتقان، كەيىن رەسەي كومپانياسى قول استىنا الۋ ءۇشىن جاسالعان ساياسي قۋعىن» دەپ سانايتىن ازاماتتىق قوعام وكىلدەرى سوڭعى كەزدەرى ۇدايى پيكەت-ميتينگكە شىعىپ، بوساتۋىن تالاپ ەتكەن بولاتىن. دەسە دە قازاقستان سوتى بۇل تالاپتارعا مويىن بۇرماپ ەدى. 2018 جىلدىڭ 28 قاراشاسىندا مەرزىمىنىڭ جارتىسىنان كوبىن وتەۋىنە  بايلانىستى ءبىرىنشى رەت تۇسىرگەن اپپەلياتسيالىق ارىزىن سەمەيدىڭ №2 سوتى، ال بىلتىر 24 شىلدە دە اتالعان سوت، 10 قىركۇيەكتە وسكەمەندەگى وبلىستىق سوت قاتارىنان ءۇش مارتە قاناعانتاندىرماي تاستاعان.

2018 جىلى مامىردا مەديتسينالىق كوميسسيا قورىتىندىسى بويىنشا، تۇتقىنداعى مۇحتار جاكىشەۆكە ءۇشىنشى توپتاعى مۇگەدەكتىك دياگنوزى قويىلدى. ونىڭ ءتورت قىزى مەن ۇلى بۇگىندە ەرجەتىپ ۇلگەرگەن.

"The Qazaq Times"