تۇركيا اقش-قا شاعىم ءتۇسىردى

تۇركيا اقش-تىڭ ءسۇريادا قاۋىپسىز ايماق قۇرۋ بويىنشا بىرلەسكەن وپەراتسيادا نەمقۇرايدىلىق تانىتتى دەپ شاعىمداندى. بۇل تۋرالى تۇركيا سىرتقى ىستەر ءمينيسترى مەۆليۋت چاۆۋشوگلۋ Reuters اگەنتتىگىنە حابارلادى.

ءمينيستردىڭ مالىمدەۋىنشە، ۋاشينگتون انكارامەن ورتاق كەلىسىمدەگى تالاپتاردى ورىنداماي، ءسۇريا ماسەلەسىندە سالعىرتتىق تانىتىپ وتىر. تاراپتار قاۋىپسىز ايماق قۇرا الماسا، ميگرانتتار اعىنى ەۋروپاعا ءوتىپ كەتۋى مۇمكىن.

9 قىركۇيەكتە اقش پەن تۇركيا اسكەرلەرى ءسۇريانىڭ ەۆفرات وزەنىنەن شىعىس اۋداندارىندا ءۇش ساعاتقا جۋىق ارنايى وپەراتسيا باستاعان. مالىمەتتەرگە سۇيەنسەك، وپەراتسياعا اكچالاك ايماعىنان تۇرىكتىڭ التى بەرەندى تەحنيكاسى قاتىسقان.

تاياۋدا تۇرىك باسشىسى رەجەپ تايىپ ەردوعان اتالعان ماسەلەنى شەشۋ ماقساتىندا ەۋروپا ەلدەرىنەن لوگيستيكالىق كومەك سۇراعان. ەگەر حالىقارالىق ۇيىمدار ءسۇريانىڭ سولتۇستىگىندە ارنايى قاۋىپسىز ورىن دايىنداۋعا قولداۋ كورسەتپەسە، ميلليونداعان بوسقىندار لەگى ءۇشىن گرەكيا ارقىلى ەۋروپا شەكارا اشىلماق. قازىرگى ۋاقىتتىڭ وزىندە تۇركيادا ازاماتتىق سوعىستان قاشقان 3,6 ميلليونعا جۋىق بوسقىن بار.

"The Qazaq Times"