سوعىس دالاسىنداعى قىرعىز بالاسى. فوتو: KTR.

قىرعىزستان يراكتاعى سوعىسقا ارالاسقان قىرعىزستاندىق جيھادشىلاردىڭ بالالارىن ەلگە قايتارۋ ءۇشىن باعداتقا ارنايى جۇمىس توبىن اتتاندىرماق. بۇل تۋرالى قىرعىز ۇكىمەتى رەسمي مالىمدەمە تاراتتى.

يراك پەن قىرعىزستان ۇكىمەتتەرى اراسىندا قىرعىزستاندىق جيھادشىاردىڭ بالالارىن ەلىنە قايتارۋ جانە ولاردى قوعامعا قايتا دايىنداۋ ماقساتىندا ۇكىمەت ارالىق توپ قۇرىلعان. تاياۋ ارادا قىرعىزستاندىق جۇمىس توبى باعداتقا بارماق.

قىرعىزستان ۇكىمەتىنىڭ رەسمي مالىمدەۋلەرىندە «قىرعىزستاندىقتاردىڭ بالالارى» دەپ ايتىلادى. سوندىقتان، ارنايى جۇمىس توبىنىڭ راديكال توپتارعا ىلەسكەندەردىڭ تەك بالالارىن عانا ەلگە قايتارا ما، الدە جيھادشىل ازاماتتار دا بار ما، ول جاعى انىق ەمەس.

ارنايى توپ بۇعان قوسا ءسۇريا جەرىندەگى قىرعىزستان ازاماتتارىنىڭ سانىن جانە ولاردىڭ قايدا ەكەنىن انىقتاۋ جۇمىسىن دا قوسا اتقارادى. مالىمەتتەرگە قاراعاندا، ەكسترەميستىك توپتارعا ىلەسكەن جۇزدەن استام قىرعىز ازاماتى ءسۇريا جەرىندە وققا ۇشقان.

ايتا كەتەيىك، ەكسترەميستىك توپتاردىڭ ارباۋىنا ىلەسىپ، سوعىس ءورتى تۇتانعان ءسۇريا مەن يراك جەرىندەگى سوعىستارعا قاتىسقان ازاماتتارى مەن ولاردىڭ وتباسىن ەلگە قايتارۋ جانە قوعامعا قايتا دايىنداۋ ءۇشىن قازاقستاندا «جۋسان» وپەراتسياسى جۇرىلگەن. اتالعان وپەراتسيا جۇزدەگەن ازاماتتى ەلگە قايتاردى. بۇنداي قادامدارعا ورتالىق ازيادان قازاقستاننان كەيىن وزبەكستان جانە تاجىكستان ەلدەرى دە بارعان بولاتىن.

“The Qazaq Times”